काठमाडौं। नेकपा एमालेको सचिवालय बैठकले पूर्वराष्ट्रपति विद्यादेवी भण्डारीलाई पुनः पार्टी सदस्यता दिने निर्णय गरेको छ। पार्टी अध्यक्ष केपी शर्मा ओलीको गुन्डूस्थित निवासमा सोमबार बसेको बैठकले उक्त निर्णय गरेको हो।
गत साउनमा एमालेले राष्ट्रपतिको गरिमा र स्वतः निष्क्रियताको सिद्धान्त अघि सार्दै भण्डारीको सदस्यता खारेज गरेको थियो। तर, पार्टीभित्र फेरिएको शक्ति सन्तुलन र राजनीतिक संकटका बीच एमालेले आफ्नो निर्णय उल्ट्याएको छ।
अध्यक्ष ओलीकै चाहना अनुसार आइतबार बल्खुमा आयोजित ३३औँ मदन-आश्रित स्मृति सभामा पूर्वराष्ट्रपति भण्डारीलाई प्रमुख अतिथि बनाइएको थियो। यसलाई दुई नेताबीचको सम्बन्ध सुधारको प्रस्थानविन्दु मानिएको छ।
हालैको निर्वाचनमा एमाले २५ सिटमा खुम्चिएपछि पार्टीभित्र ओलीको विकल्प खोज्न थालिएको छ।
११औँ महाधिवेशनमा भण्डारी पक्षले ओलीसँग प्रतिस्पर्धा गरेपछि दुई नेताबीच तिक्तता बढेको थियो। तर, महाधिवेशनको ६ महिना नबित्दै आफ्नै सहकर्मीहरूबाट घेराबन्दीमा परेका ओलीले पुरानो तिक्तता मेट्दै भण्डारीलाई पार्टीमा ससम्मान भित्र्याएका हुन्।
