काठमाडौँ। केन्द्रीय कारागार सुन्धारास्थित महिला बन्दीगृहबाट शुक्रबार मध्यराति फरार भएकी कैदीलाई प्रहरीले पुनः नियन्त्रणमा लिएको छ।
जन्मकैदको सजाय भुक्तान गरिरहेकी नुवाकोटको विदुर नगरपालिका–१३ घर भएकी २५ वर्षीया सपना तामाङलाई काठमाडौँ उपत्यका अपराध अनुसन्धान कार्यालयको टोलीले पक्राउ गरेको हो।
कारागारको उच्च सुरक्षा घेरा तोडेर फरार भएकी सपना काठमाडौँमा रहेका आफ्ना श्रीमानको डेरामा लुकिछिपी बसेको अवस्थामा फेला परेकी हुन्। प्रहरीले उनलाई लुकाउन सहयोग गरेको आशंकामा उनका श्रीमानलाई समेत नियन्त्रणमा लिएको छ।
काठमाडौँ उपत्यका प्रहरी कार्यालयका प्रवक्ता एसएसपी प्रविण धितालका अनुसार फरार बन्दी र उनका श्रीमान दुवैलाई हिरासतमा लिएर थप कानुनी कारबाही र अनुसन्धान अघि बढाइएको छ।
पुनः पक्राउ परेकी तामाङ सामान्य कसुरकी बन्दी होइनन्। उनलाई जिल्ला अदालत रसुवाबाट अपहरण, शरीरबन्धक, कर्तव्य ज्यान, र डाँकाचोरी गरी चारवटा गम्भीर मुद्दामा दोषी ठहर गर्दै जन्मकैदको फैसला सुनाइएको थियो। उनी सुन्धारास्थित महिला बन्दी गृहमा कैद भुक्तान गरिरहेकी थिइन्।
देशको मुटुमा रहेको र २४ घण्टा कडा सुरक्षा पहरा हुने सेन्ट्रल जेलको महिला बन्दी गृहबाट सपना शुक्रबार मध्यराति पर्खाल नाघेर फरार भएकी थिइन्। तर, अत्यन्तै संवेदनशील र गम्भीर अपराधमा सजाय काटिरहेकी कैदी फरार भएको सूचना कारागार प्रशासनले घटनाको १५ घण्टापछि मात्र थाहा पाएको थियो।
सुरक्षा निकायको उच्च निगरानी रहने कारागारबाट यसरी कैदी फरार हुनु र लामो समयसम्म प्रशासन बेखबर रहनुले कारागारको सुरक्षा प्रणाली, काँडेतारको सुरक्षा घेरा र ड्युटीमा रहेका सुरक्षाकर्मीहरूको कमजोरीमाथि गम्भीर प्रश्न खडा गरेको छ। यस घटनालाई लिएर कारागार प्रशासन र प्रहरीले आन्तरिक छानबिन समेत सुरु गरिसकेका छन्।
