काठमाडाैं। छठ पर्वका कारण सरकारले सार्वजनिक बिदा दिए पनि राहदानी विभागले सेवाग्राहीका लागि नियमित सेवा जारी राख्ने भएको छ।
विभागका महानिर्देशक दीपक विश्वकर्माका अनुसार सार्वजनिक बिदाको दिन सोमबार (कात्तिक ३० गते) पनि विभाग खुला रहनेछ। सेवाग्राहीलाई राहदानीसम्बन्धी काममा असुविधा नहोस् भनेर बिदाकै दिन सेवा सञ्चालन गर्ने निर्णय गरिएको उनले बताए।
विभागले अन्य नियमित कार्यदिनमा जस्तै बिहान ९ बजेदेखि अपराह्न ४ बजेसम्म राहदानीसम्बन्धी सम्पूर्ण सेवा उपलब्ध गराउने जनाएको छ।
यद्यपि, छठ पर्व मनाउने विभागका कर्मचारीलाई भने उक्त दिन बिदा दिइनेछ। सार्वजनिक बिदाका कारण राहदानी सेवा प्रभावित हुन नदिन कर्मचारी व्यवस्थापन गरेर सेवा सञ्चालन गर्न लागिएको विभागले जनाएको छ।
