काठमाडाैं। मकवानपुरको भीमफेदी गाउँपालिका–६ चिसापानीगढीमा यात्रुवाहक ईभी हाइस दुर्घटना हुँदा १४ जनाको मृत्यु भएको छ। दुर्घटनामा तीन बालबालिकासहित ६ जना घाइते भएका छन्।
प्रहरीका अनुसार बिहीबार बिहान करिब ५ः४५ बजे काठमाडौंबाट सर्लाहीतर्फ जाँदै गरेको म.प्र.०३–००१ ज ०८८० नम्बरको ईभी हाइस भीमफेदी–कुलेखानी–काठमाडौं सडकखण्डमा दुर्घटनामा परेको हो। चिसापानीगढीमा अनियन्त्रित भएको हाइस सडकबाट करिब ५०० मिटर तल भिरमा खसेको थियो।
हाइसमा चालकसहित २० जना सवार रहेको प्रहरीले जनाएको छ। दुर्घटनाको खबर प्राप्त हुनासाथ इलाका प्रहरी कार्यालय भीमफेदीबाट प्रहरी टोली घटनास्थल पुगेको थियो। उद्धारका लागि नेपाल प्रहरी, सशस्त्र प्रहरी बल र नेपाली सेनाको टोलीसमेत परिचालन गरिएको थियो।
उद्धारका क्रममा १४ जनाको शव फेला परेको प्रहरीले जनाएको छ। दुर्घटनामा घाइते भएका ६ जनालाई उद्धार गरी हेटौंडा अस्पताल पुर्याइएको थियो। तीमध्ये तीन जनाको उपचारपछि डिस्चार्ज गरिएको छ भने बाँकी तीन जनालाई थप उपचारका लागि अन्य अस्पतालमा पठाइएको छ।
घाइतेमध्ये तीन वर्षीय सुजन यादव र १४ महिनाका सुदिप यादवलाई थप उपचारका लागि काठमाडौंस्थित मेडिसिटी अस्पताल रिफर गरिएको छ। त्यस्तै, ३१ वर्षीय बेचु भनिने देवेन्द्र रायलाई भरतपुरस्थित मनकामना अस्पताल पठाइएको छ।
उपचारपछि डिस्चार्ज हुनेमा ३३ वर्षीय मुकेश यादव, पाँच वर्षीय सक्षम कुमार यादव र २६ वर्षीय देवेन्द्र राय छन्।
दुर्घटनामा मृत्यु हुनेमा हाइस चालक सर्लाहीको कबिलासी गाउँपालिका–८ का ३० वर्षीय रविशंकर कुमार मण्डल छन्। अन्य मृतक सबै सर्लाहीको चक्रघट्टा गाउँपालिका–४ सुन्दरपुरटोलका बासिन्दा हुन्।
मृत्यु हुनेमा २६ वर्षीय बिकेश यादव, २८ वर्षीया पुनम यादव, सात वर्षीया दिक्षा यादव, पाँच वर्षीया दिपिका यादव, १० वर्षीया अनु कुमारी यादव, ३५/३६ वर्षीय गुड्डु यादव, ३०/३२ वर्षीया गायत्री देवी, २५/२६ वर्षीय राम दुलार यादव, २४/२५ वर्षीय सुबोध यादव, १५ वर्षीय रोहन यादव, ३५ वर्षीय राकेश यादव, २८ वर्षीय छोटु राय भनिने रामप्रसाद राय यादव र १७/१८ वर्षीय सुधेश यादव छन्।
दुर्घटनाको कारणबारे प्रहरीले अनुसन्धान गरिरहेको छ।
