काठमाडौं। नेपाली कांग्रेसले केन्द्रीय नीति, अनुसन्धान तथा प्रशिक्षण प्रतिष्ठानमा थप आठ जना सदस्य मनोनयन गरेको छ। उपसभापति तथा प्रतिष्ठान प्रमुख विश्वप्रकाश शर्माले पार्टी विधान २०१७ (संशोधनसहित) को धारा ३६(१) (ग) बमोजिम मंगलबार उनीहरूलाई नियुक्त गरेका हुन्।
नवनियुक्त सदस्यहरूमा पार्टीका केन्द्रीय सदस्यदेखि नीति अनुसन्धान, कृषि, सञ्चार, आदिवासी, अल्पसंख्यक तथा लैङ्गिक तथा यौनिक अल्पसंख्यक समुदायका प्रतिनिधिहरूलाई समेटिएको छ।
प्रतिष्ठानमा नियुक्त हुनेहरूमा कांग्रेसका केन्द्रीय सदस्य तथा राष्ट्रिय लोकतान्त्रिक अपाङ्ग संघका पूर्व केन्द्रीय अध्यक्ष प्रकाश पन्थ, ह्योल्मो समुदायमाथि विद्यावारिधि गरेका डा प्रेमध्वज लामा, बेलायतमा दुई दशक बसेर ुपब्लिक पोलिसीमा स्नातकोत्तर गरेका तथा नेपाली जनसम्पर्क समिति बेलायतका पूर्वसंयोजक विज्ञान प्रसाईं, आदिवासी जनजाति प्रतिष्ठानका पूर्वकार्यकारी अध्यक्ष रेशम गुरुङ, कृषि अभियन्ता तथा मुक्तिनाथ कृषि कम्पनीका अध्यक्ष सिताराम काफ्ले, अंग्रेजी साहित्यमा स्नातकोत्तर प्रतीक्षा चापागाईं, मास कम्युनिकेसनमा स्नातकोत्तर मोहन गजुरेल तथा मास कम्युनिकेसन एवं पत्रकारितामा स्नातकोत्तर अनुपा श्रेष्ठ रहेका छन्।
कांग्रेसले प्रतिष्ठानमा विभिन्न क्षेत्रका विज्ञ, युवा तथा विविध समुदायको प्रतिनिधित्व बढाउने उद्देश्यका साथ नयाँ सदस्य मनोनयन गरेको जनाएको छ। नीति, अनुसन्धान र प्रशिक्षणसम्बन्धी गतिविधिलाई थप प्रभावकारी बनाउने अपेक्षासहित यी नियुक्तिहरू गरिएको पार्टीले जनाएको छ।
