काठमाडौँ। नेपाल राष्ट्र बैंकले सार्वजनिक गरेको आर्थिक वर्ष २०८३/८४ को मौद्रिक नीतिले सेयर बजारका लगानीकर्ता र सार्वजनिक यातायात क्षेत्रलाई विशेष सम्बोधन गरेको छ। कर्जा प्रवाहलाई सहज बनाई निजी क्षेत्रको मनोबल उच्च राख्ने रणनीति अनुरूप राष्ट्र बैंकले नीतिगत खुकुलोपन अपनाएको हो।
संस्थाको सबलताका आधारमा सेयर कर्जाको सीमा
मौद्रिक नीतिले सेयर बजारका लगानीकर्ताहरूलाई लक्षित गर्दै बैंक तथा वित्तीय संस्थाको सबलताका आधारमा सेयर धितो कर्जाको सीमा निर्धारण हुने व्यवस्था गरिने उल्लेख गरेको छ।
यस व्यवस्थाले बजारमा कर्जा प्रवाहलाई थप व्यवस्थित र संस्थाको क्षमता अनुसार गतिशील बनाउने विश्वास गरिएको छ।
ठूला विद्युतीय सवारीलाई प्राथमिकता
वातावरणमैत्री यातायात र नवीकरणीय ऊर्जाको प्रयोगलाई प्रोत्साहन गर्न राष्ट्र बैंकले सार्वजनिक सवारीका रूपमा प्रयोग हुने ठूला विद्युतीय सवारी साधनको कर्जा मूल्य अनुपातलाई सहज बनाउने घोषणा गरेको छ। यसले सार्वजनिक यातायात क्षेत्रमा विद्युतीय गाडी भित्र्याउन चाहने व्यवसायीहरूलाई कर्जा प्राप्तिमा सहजता प्रदान गर्नेछ।
तथापि, राष्ट्र बैंकले अर्थतन्त्रमा चुनौती देखिएमा नीति कसिलो बनाउन सक्ने चेतावनी पनि दिएको छ।
यथेष्ट तरलता सहितको न्यून-लागत अर्थतन्त्रबाट अपेक्षित लाभ लिन नसकिएमा वा समष्टिगत आर्थिक स्थायित्वमा चुनौती देखिएमा मौद्रिक नीतिको कार्यदिशा पुनरावलोकन गरी ब्याजदर करिडोरलाई आवश्यकतानुसार क्रमशः साँघुरो बनाउँदै लगिने बैंकले स्पष्ट पारेको छ।
