काठमाडौं। नेपाल सरकार र एसियाली विकास बैक (एडिबी) बीच कुल १६५ मिलियन (१६ करोड ५० लाख) अमेरिकी डलर बराबरको सहुलियतपूर्ण ऋण सम्झौतामा हस्ताक्षर भएको छ। उक्त ऋण खानेपानी तथा ढल व्यवस्थापन पूर्वाधार विस्तार र भन्सार तथा लजिष्टिक्स प्रणाली सुधारका लागि परिचालन गरिनेछ।
अर्थ मन्त्रालयमा सोमबार आयोजित समारोहमा अर्थमन्त्री डा स्वर्णिम वाग्ले र एडिबीका अध्यक्ष मासातो कान्डाको उपस्थितिमा सम्झौतामा हस्ताक्षर भएको हो। नेपाल सरकारका तर्फबाट अर्थ सचिव घनश्याम उपाध्याय र एडिबीका तर्फबाट नेपालस्थित आवासीय नियोगका देशीय निर्देशक आनो कुश्वाले सम्झौतापत्रमा हस्ताक्षर गरेका हुन्।
सम्झौताअनुसार एकीकृत खानेपानी तथा ढल व्यवस्थापन (क्षेत्रगत) आयोजनाका लागि ११५ मिलियन अमेरिकी डलर सहुलियतपूर्ण ऋण उपलब्ध हुनेछ। उक्त रकम स्थानीय तहमा खानेपानी तथा ढल व्यवस्थापनको एकीकृत पूर्वाधार निर्माणमा खर्च गरिनेछ।
त्यसैगरी, दक्षिण एसिया उपक्षेत्रीय आर्थिक सहयोग तथा लजिष्टिक्स सुधार कार्यक्रम–उपकार्यक्रम २ अन्तर्गत ५० मिलियन अमेरिकी डलर सहुलियतपूर्ण ऋण उपलब्ध हुनेछ। यो रकम भन्सार कार्यप्रक्रिया र लजिष्टिक्स सेवा आधुनिकीकरणका लागि गरिएका सुधारबापत बजेटरी सहायताका रूपमा परिचालन गरिने अर्थ मन्त्रालयले जनाएको छ।
अर्थमन्त्रीवाग्लेले नेपालको आर्थिक तथा सामाजिक विकासमा एडिबीले पुर्याउँदै आएको योगदानको प्रशंसा गर्दै आगामी दिनमा दुई पक्षबीचको विकास साझेदारी अझ सुदृढ हुने विश्वास व्यक्त गरे।
एडिबीका अध्यक्ष मासातो कान्डाले नेपालसँगको करिब ६ दशक लामो सहकार्यलाई थप प्रभावकारी बनाउने प्रतिबद्धता जनाउँदै नेपालको बाह्य तथा आन्तरिक आर्थिक चुनौती सामना गर्न बैंक निरन्तर सहयोगी रहने बताए। उनले नेपालको विकास प्राथमिकतासँग एडिबीका रणनीति र प्राथमिकता मेल खाने पनि उल्लेख गरे।
