काठमाडौं। प्रधानमन्त्री वालेन्द्र शाहको नाम र कार्यकक्षको दुरुपयोग गर्दै दैलेखका एक वडासचिवलाई धाकधम्की दिने रास्वपा कार्यकर्ता काठमाडौँबाट पक्राउ परेका छन्।
दैलेखको दुल्लु नगरपालिका–१३ का वडासचिव कमल भण्डारीलाई फोनमार्फत धम्क्याउने स्थानीय प्रकाश खड्कालाई जिल्ला प्रहरी परिसर काठमाडौँले शनिबार नियन्त्रणमा लिएको हो। पक्राउ परेका खड्का रास्वपामा आबद्ध कार्यकर्ता हुन्।
काठमाडौँमा बस्दै आएका खड्काले आफू प्रधानमन्त्री तथा मन्त्रिपरिषद्को कार्यालयबाट बोलेको भन्दै वडा सचिव भण्डारीलाई प्रक्रिया मिचेर सिफारिस गरिदिन दबाब र धम्की दिएका थिए। घटनासँग सम्बन्धित एक अडियो रेकर्ड सार्वजनिक भएलगत्तै प्रधानमन्त्री कार्यालयले गम्भीर चासो देखाएको थियो।
प्रधानमन्त्रीको नाम बेचेर तल्लो तहका कर्मचारीलाई आतङ्कित पारेको पुष्टि भएपछि प्रधानमन्त्री कार्यालयकै निर्देशनमा प्रहरीले शनिबार खड्कालाई काठमाडौँबाट समातेको हो।
रास्वपा दैलेखका जिल्ला सचिव प्रकाशकुमार बुढाले पक्राउ परेका खड्कालाई हदैसम्मको कारबाहीका लागि पार्टीको केन्द्रीय अनुशासन समितिमा सिफारिस गरिसकिएको जानकारी दिए।
