काठमाडौँ। नेपाली कांग्रेसमा विशेष महाधिवेशनमार्फत पुस्तान्तरण र नेतृत्व परिवर्तन गरेको दाबी गरे पनि आर्थिक व्यवस्थापनको साँचो भने अझै पुरानै नेतृत्वको विश्वासपात्रकै हातमा रहेको छ।
सभापति गगन थापाले पार्टीको बागडोर सम्हालेपछि धेरै विभाग र जिम्मेवारीमा नयाँ अनुहार ल्याए पनि कोषाध्यक्षको मनोनयनमा भने पूर्वसभापति शेरबहादुर देउवाकै रोजाइलाई सदर गरेका छन्।
देउवाले आफ्नो कार्यकालमा व्यवसायी तथा नेता उमेश श्रेष्ठलाई पार्टीको केन्द्रीय कोषाध्यक्षमा मनोनयन गरेका थिए। विशेष महाधिवेशनपछि थापाले नेतृत्व लिँदा पार्टीका धेरै संरचना परिवर्तन भए पनि कोषाध्यक्ष पदमा देउवा निकटकै व्यक्तिलाई निरन्तरता दिनु वा उनीसँगै निकट रहेर काम गरेका पात्रलाई चयन गर्नुलाई अर्थपूर्ण रूपमा हेरिएको छ।
पार्टीभित्र विद्रोही छवि बनाएका थापाले कोषाध्यक्षको हकमा देउवा पक्षीय पात्रलाई नै स्वीकार गर्नुका पछाडि मुख्य दुई कारण देखिन्छन्।
महाधिवेशनमा नेतृत्व परिवर्तन भए पनि पार्टीभित्र देउवा पक्षको ठुलो हिस्सालाई चिढ्याउनुभन्दा शक्ति सन्तुलन मिलाउनु थापाको बाध्यता देखिएको छ। त्यस्तै पार्टीको आर्थिक परिचालन र व्यवस्थापनमा अनुभवी र स्थापित व्यक्तिलाई नै राख्दा संस्थागत निरन्तरता हुने बुझाइ संस्थापन पक्षको रहेको देखिन्छ।
