मुगु। मुगुमा हाईलक्स जिप सडकबाट करिब ६०० मिटर तल खस्दा तीन जनाको मृत्यु भएको छ। दुर्घटनामा चालकसहित दुई जना घाइते भएका छन्।
सुर्खेतबाट रारातर्फ जाँदै गरेको बा १७ च १८६४ नम्बरको हाईलक्स जिप छायानाथ रारा नगरपालिका–७ स्थित टोप्लामा दुर्घटनामा परेको हो। कच्ची सडक खण्डमा गुडिरहेको जिप आइतबार अचानक सडकबाट तल खसेको प्रहरीले जनाएको छ।
दुर्घटनामा काठमाडौंको कलंकीका ५० वर्षीय विजय बस्नेत, काठमाडौंका ५४ वर्षीय रमेश बिडारी र ५० वर्षीय पूर्णकुमार थापाको मृत्यु भएको छ।
दुर्घटनामा गम्भीर घाइते भएका तीनै जनालाई उद्धार गरी जिल्ला अस्पताल मुगु पुर्याइएको थियो। अस्पताल पुर्याएलगत्तै चिकित्सकले उनीहरूलाई मृत घोषणा गरेका थिए।
दुर्घटनामा ललितपुर महानगरपालिका–१५ निवासी ५४ वर्षीया अन्जु थापा र जिप चालक ५८ वर्षीय कञ्चन थापा घाइते भएका छन्। उनीहरूको जिल्ला अस्पताल मुगुमा उपचार भइरहेको छ। दुवैको अवस्था मध्यम रहेको प्रहरीले जनाएको छ।
दुर्घटनाको जानकारी पाएपछि जिल्ला प्रहरी कार्यालय मुगुका प्रहरी नायव उपरीक्षक रविराज थपलियाको नेतृत्वमा १० जना र ताल्चास्थित बी.सु. गार्डबाट प्रहरी नायव निरीक्षक डम्बरबहादुर अधिकारीको नेतृत्वमा सात जनाको टोली घटनास्थल पुगेको थियो।
प्रहरीका अनुसार जिपमा चालकसहित पाँच जना सवार थिए। दुर्घटना कसरी भयो भन्नेबारे खुल्न बाँकी छ। चालकले मादक पदार्थ सेवन गरे/नगरेको विषयमा समेत अनुसन्धान भइरहेको छ।
