काठमाडौं। प्रधानमन्त्री बालेन्द्र शाहको आसन्न भारत भ्रमणको तयारी भइरहेका बेला भारतले नेपालकाे जनकपुरधाम र उत्तर प्रदेशको अयोध्याबीच साप्ताहिक रेल सेवा सञ्चालन गर्ने निर्णय गरेको छ।
भारतीय रेल मन्त्रालयले शनिबार जनकपुरधामदेखि अयोध्यासम्म रेल सञ्चालन गर्ने प्रस्तावलाई स्वीकृति दिएको हो। प्रधानमन्त्री शाह आगामी मंसिर ६ गतेदेखि भारतको औपचारिक भ्रमणमा जाने तयारीमा छन्। उनको भ्रमणको पूर्वसन्ध्यामा दुई देशका प्रमुख धार्मिक गन्तव्यलाई रेलमार्गबाट जोड्ने निर्णय भएको हो।
भारतीय सञ्चारमाध्यमका अनुसार प्रधानमन्त्री शाह र भारतीय प्रधानमन्त्री नरेन्द्र मोदीले नोभेम्बर २३ मा नयाँदिल्लीबाट भर्चुअल माध्यममार्फत रेल सेवाको उद्घाटन गर्ने तयारी छ। यद्यपि नियमित व्यावसायिक सेवा सुरु हुने मिति भने औपचारिक रूपमा सार्वजनिक गरिएको छैन।
भारतीय रेल मन्त्रालयका अनुसार जनकपुरधामदेखि अयोध्या क्यान्टसम्म रेलले करिब ६०४ किलोमिटर दूरी तय गर्नेछ। रेल बिहार र उत्तर प्रदेशका विभिन्न सहर हुँदै सञ्चालन हुनेछ।
स्वीकृत तालिकाअनुसार रेल प्रत्येक शनिबार जनकपुरधामबाट अयोध्याका लागि छुट्नेछ भने प्रत्येक सोमबार अयोध्या क्यान्टबाट जनकपुरधाम फर्किनेछ। यस क्रममा जयनगर, मधुबनी, सिसो, सीतामढी, रक्सौल, नरकटियागन्ज, गोरखपुर, बस्ती, मनकापुर र अयोध्या धाममा बिसौनी रहनेछन्।
माता सीताको जन्मस्थलका रूपमा परिचित जनकपुरधाम र भगवान् रामको जन्मस्थल मानिने अयोध्यालाई जोड्ने यो रेल सेवाले धार्मिक पर्यटन प्रवर्द्धनमा सहयोग पुग्ने भारतीय पक्षको अपेक्षा छ। रामायण सर्किटसँग सम्बन्धित यी दुई तीर्थस्थलमा दर्शन गर्न जाने नेपाली तथा भारतीय यात्रुलाई यसबाट आवतजावत सहज हुनेछ।
रेल सेवाले धार्मिक पर्यटनबाहेक शिक्षा, व्यापार तथा पारिवारिक प्रयोजनका लागि सीमापार यात्रा गर्ने नागरिकलाई पनि सुविधा पुग्ने भारतीय रेल मन्त्रालयले जनाएको छ। रेलमार्ग आसपासका होटल, पर्यटन व्यवसाय, स्थानीय व्यापार तथा हस्तकलासम्बन्धी व्यवसायले समेत लाभ लिन सक्ने उसको अपेक्षा छ।
यसअघि नेपाल र भारतबीच सीमापार रेल सञ्जाल विस्तार तथा जनकपुर–अयोध्या रेल सेवा सञ्चालनका विषयमा द्विपक्षीय छलफल भएको थियो। आवश्यक प्राविधिक तथा सञ्चालनसम्बन्धी व्यवस्थाबारे दुवै देशका अधिकारीबीच सहमति जुटेपछि भारतले सेवा सञ्चालनको प्रस्ताव स्वीकृत गरेको हो।
