काठमाडौं । मलेसिया जाने नेपाली श्रमिकमाथि भएको ठगी तथा विदेशी मुद्रा अपचलनसम्बन्धी अनुसन्धान उच्चपदस्थ सरकारी अधिकारीसम्म पुगेको छ।
प्रकरणमा बुधबार पक्राउ परेका पूर्वमन्त्रीद्वय शेरबहादुर कुँवर र रामेश्वर राय यादवसहित ६ जनालाई थप चार दिन हिरासतमा राखेर अनुसन्धान गर्न अदालतले अनुमति दिएको छ। यसै प्रकरणमा पूर्वमुख्यसचिव एकनारायण अर्यालविरुद्ध पनि पक्राउ पुर्जी जारी भएको छ।
जिल्ला अदालत काठमाडौंले बिहीबार पूर्वमन्त्रीद्वय र श्रम मन्त्रालयका चार कर्मचारीलाई हिरासतमा राख्न चार दिनको म्याद थप गरेको हो। उनीहरूलाई नेपाल प्रहरीको केन्द्रीय अनुसन्धान ब्युरो (सीआईबी) ले बुधबार राति पक्राउ गरेको थियो।
पक्राउ पर्नेमा तत्कालीन श्रममन्त्रीद्वय कुँवर र यादव, श्रम मन्त्रालयका तत्कालीन सचिव विनोद केसी, सहसचिवद्वय उमेश ढुंगाना र राजीव पोखरेल तथा उपसचिव निर्मला गुरुङ छन्।
सीआईबीका अनुसार उनीहरूमाथि ठगी तथा संगठित अपराधसम्बन्धी कसुरमा अनुसन्धान भइरहेको छ।
पूर्वमुख्यसचिव अर्यालविरुद्ध पनि पक्राउ पुर्जी
अनुसन्धानको दायरामा पूर्वमुख्यसचिव एकनारायण अर्यालसमेत तानिएका छन्। सीआईबीको प्रतिवेदनका आधारमा जिल्ला अदालत काठमाडौंले उनीविरुद्ध पक्राउ पुर्जी जारी गरेको हो।
सीआईबी प्रमुख एवं प्रहरी अतिरिक्त महानिरीक्षक उमाप्रसाद चतुर्वेदीले अर्यालविरुद्ध पक्राउ पुर्जी जारी भएको जानकारी दिएका छन्।
मलेसिया जाने नेपाली श्रमिकसँग जोडिएको आर्थिक अनियमिततामा मन्त्रालयका तत्कालीन मन्त्रीदेखि सचिव र अन्य उच्चपदस्थ अधिकारीसम्मको भूमिकाबारे अनुसन्धान भइरहेको छ। पक्राउ पुर्जी जारी भएसँगै यस प्रकरणमा अर्यालको भूमिकासमेत अनुसन्धानको विषय बनेको छ।
एक अर्ब ६९ करोडभन्दा बढी अपचलनको आरोप
मलेसिया सरकार र नेपाल सरकारबीच भएको सम्झौताविपरीत गैरकानुनी रूपमा रकम संकलन गरी अपचलन गरेको आरोप सम्बन्धित व्यक्तिहरूमाथि छ।
अनुसन्धानमा अमेरिकी डलर ३ लाख ७० हजार ४३९ र बेलायती मुद्रा ३७ लाख १७ हजार ९०.८० गरी कुल एक अर्ब ६९ करोड २ लाख २४ हजार २६ रुपैयाँ ७६ पैसा बराबरको रकम अपचलन भएको दाबी गरिएको छ।
यसअघि पनि यही प्रकरणमा व्यवसायी कैलाश खड्कासहित चार जना पक्राउ परिसकेका छन्।












