काठमाडौं। मकवानपुरको भीमफेदीमा यात्रुवाहक सुमो जिप दुर्घटना हुँदा दुई युवतीसहित तीन जनाको मृत्यु भएको छ। दुर्घटनामा सात जना घाइते भएका छन्। मृत्यु हुने र घाइते हुने सबै रौतहटको चन्द्रनिगाहपुर क्षेत्रका बासिन्दा हुन्।
रौतहटको चन्द्रनिगाहपुरबाट काठमाडौं आउँदै गरेको ना.१ ज २१४३ नम्बरको सुमो बिहीबार भीमफेदी गाउँपालिका–१ भैँसेस्थित हेटौँडा–भैँसे सडकखण्डमा दुर्घटनामा परेको हो।
मृत्यु हुनेमा चन्द्रनिगाहपुर नगरपालिका–४ की २५ वर्षीया अनुसा लामा, सोही ठाउँकी २० देखि २२ वर्षीया जेशिका भन्ने अस्मिता तिमल्सिना र चन्द्रनिगाहपुर नगरपालिका–३ का ५० वर्षीय बमबहादुर वाइबा रहेका छन्।
दुर्घटनामा घाइते हुनेमा सुमो चालक चन्द्रनिगाहपुर नगरपालिका–४ का ३३ वर्षीय कालुमान लोप्चन छन्। उनको ढाडमा चोट लागेको छ।
त्यस्तै चन्द्रनिगाहपुर नगरपालिका–३ का १६ वर्षीया निमा थिङ, ५८ वर्षीय कान्छाध्वज थिङ, १५ वर्षीया सुमिना थिङ, १६ वर्षीया सिखा लामा, ५५ वर्षीया हरिमाया थिङ र १९ वर्षीय वेयहान राना मगर घाइते भएका छन्।
घाइतेमध्ये निमाको बायाँ काँध र दायाँ हातमा, कान्छाध्वजको बायाँ करङमा, सुमिना र सिखाको ढाडमा तथा हरिमायाको बायाँ काँधमा चोट लागेको छ। वेयहानको टाउको र ढाडमा चोट लागेको प्रहरीले जनाएको छ।
घाइते सातै जनाको अवस्था मध्यम रहेको र उनीहरूको हेटौँडा अस्पतालमा उपचार भइरहेको मकवानपुर प्रहरीले जनाएको छ।
प्रहरीका अनुसार बिहीबार बिहान करिब ८ः३५ बजे घुम्तीमा अनियन्त्रित भएको सुमो सडकबाट करिब १० मिटर तल भैँसे खोलामा खसेको थियो।
दुर्घटनापछि प्रहरीले तत्काल उद्धार गरी चालकसहित १० जना घाइतेलाई अस्पताल पुर्याएको थियो। अस्पतालमा बिहान ९ः२० बजे चिकित्सकले तीन जनालाई मृत घोषणा गरेका थिए। घटनाबारे थप अनुसन्धान भइरहेको प्रहरीले जनाएको छ।
यसअघि गत साता बिहीबार मात्र भीमफेदी गाउँपालिका-६ चिसापानी गढीमा मधेश प्रदेश ०३-००१ ज ०८८० नम्बरको हाइस यात्रुवाहक हाइस दुर्घटना हुँदा १४ जनाको मृत्यु भएको थियो।












