जादैछ्याै
जाँदा
अतीत बाेक्नु हुँदैन
सुख भएपनि त्यसैकाे तिर्सनाले सताउँछ
दु:ख भए पनि त्यसैकाे ताडनाले डसिजान्छ
नबाेक्नु कुनै सुखदुःख ।
आँखाहरु आफ्नै अगाडिको बाटाेमा ओछ्याउनु
हेरेर बाटाे थाहा पाउनु
अस्तित्वले बनाएकाे तिमीलाई,
उसैले हिँडाएकाे पनि तिमीलाई
याे तमाम ब्रह्माण्डलाई पनि ।
उसैमा समाहित हुनु
उही हाे आमा
उसकै काखमा रमाउनु ।
बिस्तारै बिर्सनु अहम्
आफ्ना स्वादहरुमा नखाेज्नु खाना
आदतहरुमा नराख्नु आफू
पाेशाकहरुमा नदेख्नु स्तर ।
सानाे हुन सिकाउछ खुशीका लागि प्रकृति,
भइदिनु सबैसँग मलिन मुस्कान ।
जादैछ्याै
उतातिर पनि यिनै घामजुन बतास र पानी
तिम्रा निसर्त साथी हुन्छन्
तिनैलाई सुनाउनु अनाम एकान्त
तिनैमा राखिदिनु ध्यानका पत्रहरु
आकासमा घुमिरहेका हुनेछन्
मेरा आशीर्वादहरु
कहिलेकाहीँ आकासकाे निलाेपाटिमा अमेट अक्षर बनाएर
मेरा सद्भावहरु पढ्नू ।
जादैछ्याै,
हलुका भएर जानू ।
ज्योती जंगल
