काठमाडौं। देशभर आगामी तीन दिन मौसम मिश्रित रहने देखिएको छ।
पहाडी तथा हिमाली क्षेत्रमा मेघगर्जनसहित वर्षा र हिमपातको सम्भावना रहँदा तराई क्षेत्रमा भने चर्को गर्मी र तातो लहरको जोखिम कायम रहने जल तथा मौसम पूर्वानुमानले जनाएको छ।
बिहीबार दिउँसो हिमाली क्षेत्रमा सामान्य बदली, पहाडी क्षेत्रमा आंशिक बदली र तराईमा मुख्यतः सफा मौसम रहनेछ।
कोशी प्रदेशका हिमाली तथा पहाडी भूभाग र गण्डकी तथा कर्णाली प्रदेशका हिमाली क्षेत्रमा केही स्थानमा मेघगर्जन, चट्याङसहित मध्यम वर्षा वा हिमपातको सम्भावना रहेको छ। तराई र उपत्यकाहरूमा भने तातो दिनको प्रभाव रहनेछ, विशेषगरी लुम्बिनी र सुदूरपश्चिमका तराई क्षेत्रमा तातो लहर चल्ने संकेत छ।
राति भने अधिकांश स्थानमा मौसम सफा रहनेछ। तर कोशी प्रदेशका पहाडी तथा हिमाली क्षेत्रमा हल्का वर्षा वा हिमपात हुन सक्नेछ।
शुक्रबार पनि पहाड र हिमालमा बदली रही केही स्थानमा वर्षा तथा हिमपातको सम्भावना छ। कोशी, बागमती र गण्डकी प्रदेशका विभिन्न स्थानमा मेघगर्जनसहित वर्षा हुन सक्नेछ भने तराईका केही भागमा पनि क्षणिक वर्षा देखिन सक्छ। यद्यपि मधेशसहित तराई क्षेत्रमा गर्मी कायमै रहनेछ, लुम्बिनी र सुदूरपश्चिममा तातो लहरको जोखिम यथावत् रहनेछ।
शनिबार पनि मौसमको यही प्रवृत्ति दोहोरिने देखिएको छ। पहाडी र हिमाली क्षेत्रमा वर्षा र हिमपातको सम्भावना रहँदा तराई क्षेत्रमा गर्मी र तातो लहरको प्रभाव जारी रहनेछ। केही स्थानमा मेघगर्जन, चट्याङसहित मध्यम वर्षा हुन सक्ने भएकाले सतर्कता अपनाउन आग्रह गरिएको छ।
सावधानी सुझाव
तराई तथा उपत्यकामा उच्च तापक्रमका कारण डिहाइड्रेसन, हीट स्ट्रोक जस्ता समस्या हुन सक्ने भएकाले पर्याप्त पानी पिउन, दिउँसो घाममा बाहिर ननिस्कन र आवश्यक सतर्कता अपनाउन मौसमविद्ले सुझाव दिएका छन्। साथै पहाडी क्षेत्रमा मेघगर्जन र चट्याङबाट बच्न सुरक्षित स्थानमा बस्न आग्रह गरिएको छ।
