विशेष महाधिवेशन हुँदैन, हुन दिँदैनौं : नेता सिटौला

काठमाडौं । नेपाली कांग्रेसका वरिष्ठ नेता तथा राष्ट्रिय सभामा पार्टी संसदीय दलका नेता कृष्णप्रसाद सिटौलाले आसन्न राष्ट्रिय सभा निर्वाचनमा अन्य दलहरूसँग रणनीतिक तालमेल गरेर अघि बढ्ने तयारी रहेको बताएका छन्।

सोमबार काठमाडौंको जमलमा आयोजित पत्रकार सम्मेलनमा सिटौलाले राष्ट्रिय सभा निर्वाचनमा सहकार्यका विषयमा कांग्रेसले विभिन्न राजनीतिक दलहरूसँग छलफल गरिरहेको जानकारी दिए। तर प्रतिनिधि सभाको आम निर्वाचनमा भने गठबन्धन नगर्ने पार्टीको स्पष्ट अडान रहेको उनले दोहोर्‍याए।

उनले भने, “राष्ट्रिय सभामा एक्लै चुनाव लड्दा अपेक्षित नतिजा आउँदैन। त्यसैले संसदमा प्रतिनिधित्व गर्ने सबै दलहरूसँग साझा सहकार्य उपयुक्त हुन्छ। आज बस्ने कार्यसम्पादन समिति बैठकले क्लस्टर र गठबन्धनका विषयमा टुंगो लगाउनेछ।”

सिटौलाका अनुसार कांग्रेसले नेकपा एमाले, नेकपा माओवादी केन्द्र तथा मधेशकेन्द्रित दलहरूसँग पनि छलफल अघि बढाएको छ।

प्रतिनिधि सभाको निर्वाचनबारे स्पष्ट पार्दै उनले भने, “प्रतिनिधि सभामा एक्लै लड्ने कांग्रेसको बटम लाइन हो। जनतासामु आफ्नै विचार, नीति र कार्यक्रम लिएर जानुपर्छ।”

पार्टीभित्र चलिरहेको विशेष महाधिवेशनको मागबारे सिटौलाले कडा अडान व्यक्त गरे। “विशेष महाधिवेशन हुँदैन, हुन दिँदैनौं। कांग्रेसलाई फुट्न वा कमजोर हुन दिँदैनौं,” उनले भने। विशेष महाधिवेशन माग गर्दै हस्ताक्षर गरेका महाधिवेशन प्रतिनिधिहरूलाई काठमाडौं नआई निर्वाचनको तयारीमा जुट्न आग्रह गर्दै उनले पार्टीभित्र अनावश्यक विवाद नगर्न चेतावनी दिए।

१५औँ महाधिवेशनमा सभापति उम्मेदवारीका विषयमा भने अहिले छलफल गर्ने समय नभएको सिटौलाको भनाइ थियो। “आम निर्वाचनपछि मात्र महाधिवेशन र नेतृत्वबारे कुरा हुन्छ। सभापतिज्यूले कसलाई उम्मेदवार बनाउने भन्ने विषयमा अहिलेसम्म कुनै संकेत दिनुभएको छैन,” उनले बताए।

उनले वैशाखमा तोकिएको महाधिवेशन र फागुनमा हुने निर्वाचनको तयारीमै पार्टी केन्द्रित हुनुपर्नेमा जोड दिए।