रास्वपालाई निर्वाचन आयोगको झड्का, चुनावी प्रचारमा घण्टी बजाउँदै हिँड्न नपाइने

काठमाडौं। चुनावको मिति नजिकिँदै जाँदा निर्वाचन आयोगले रास्वपालाई झड्का दिएको छ। निर्वाचन आयोगले चुनाव प्रचारप्रसार गर्दा निर्वाचन चिह्नको भौतिक स्वरुप प्रयोग गर्न नपाउने निर्णय गरेको हो।

रास्वपाले घण्टी बजाउँदै चुनाव प्रचार गरेको र निर्वाचन आचारसंहिता उल्लंघन गरेको गुनासो आएपछि आयोगले निर्वाचन चिह्नको प्रचारप्रसार गर्दा भौतिक स्वरुपको निर्वाचन चिह्न साथमै बोकी प्रयोग नपाउने बताएको हो। आयोगको निर्णयले रास्वपाले घण्टी बजाउँदै गरिरहेको चुनाव प्रचारको शैली परिवर्तन गर्नुपर्ने भएको छ।

‘भौतिक स्वरुपका कुनै धातु, काठ वा अन्य त्यस्तै प्रकृतिका सामाग्रीबाट बनेका निर्वाचन चिह्न प्रयोग गरी निर्वाचन प्रचारप्रसार नगर्न तथा निर्वाचन आचारसंहिता, २०८२ को दफा १३ को खण्ड (ड) मा तोकिए बमोजिमको मापदण्ड बमोजिम दलको झण्डा र चुनाव चिन्हको माध्ययबाट मात्र निर्वाचन प्रचारप्रसार गर्न गराउन र सोको विपरीत गरेको देखिएमा आचारसंहिता प्रतिकूल हुने’ आयोगका प्रवक्ता नारायण प्रसाद भट्टराईद्वारा जारी सूचनामा उल्लेख छ।