होल्डिङ सेन्टरका ५२ बालबालिका विद्यालय गए, ३० जना छात्राबासमा बस्न इच्छुक

काठमाडौँ। राधास्वामी सत्संग व्यास आश्रममा रहेका बालबालिकामध्ये ५२ जना बालबालिका मंगलबारदेखि विद्यालय गएका भएका छन्।

काठमाडौं महानगरपालिकाको शिक्षा विभागले सोमबार वद्यार्थी र अभिभावकसँग परामर्श गरेर उनीहरुको रुचि र आवश्यकता पहिचान गरेपछि वडा नम्बर १४ मा रहेको जनविकास माध्यमिक विद्यालयमा गएका हुन्। यो विद्यालय, बालबालिका रहेको ठाउँबाट पैदल दुरीमा छ।

नदी किनारामा अव्यवस्थित बसोबास गरिरहेका घर टहरा खाली गराउने क्रममा थापाथली, गैरीगाउँ र सिनामंगलसहित विभिन्न स्थानबाट ल्याइएका ६६ परिवारका २०३ जना अहिले राधास्वामी सत्संग आश्रममा छन्। उनीहरुमध्ये अपाङ्गता भएका १ जना सहित ६२ जना पुरुष, ३ जना सुत्केरी र २ जना गर्भवती सहित ८० जना महिला, ३१ जना बालिका र ३० बालक छन् ।

यी परिवारमा रहेका बालबालिकामध्ये ५२ जना बालबालिका विद्यालय उमेरका छन्। ४ जनाले यस वर्ष एसईई दिएका छन्। उनीहरु कम्प्युटर, सिलाइ बुनाइ जस्ता सिप सिक्न चाहन्छन्। महानगरपालिकाले उनीहरुले चाहेको सिपमूलक तालिमको प्रबन्ध गर्ने योजना बनाएको शिक्षा अधिकारी नमराज ढकालले बताए।