काठमाडौं । उपप्रधानमन्त्री तथा सहरी विकास मन्त्री प्रकाशमान सिंहले आफूलाई नेपाली कांग्रेसको आगामी सभापतिको रुपमा हेर्ने चाहना नेता–कार्यकर्ताहरूमा रहेको बताएका छन्।
सिंहले पार्टीका विभिन्न तहका नेताहरूसँगको भेटघाटमा उनीहरूले आफूलाई पार्टीको नेतृत्वमा देख्न चाहेको उल्लेख गरे। “जिल्ला जाँदा र पार्टीका साथीहरू भेट्दा ‘तपाईंलाई सभापतिका रूपमा हेर्न चाहेका छौँ’ भनिरहनुभएको छ,” सिंहले भने।
नेता सिंहले नेपाली कांग्रेसभित्र आफूले जिल्ला सभापति, केन्द्रीय सदस्य, निर्वाचित महामन्त्री, उपसभापति जस्ता जिम्मेवारीमा काम गरिसकेको र सभापति र प्रधानमन्त्रीबाहेक सबै जिम्मेवारी वहन गरिसकेको उल्लेख गर्दै सभापतिको दावेदारी स्वाभाविक भएको बताएका छन्।
“अब मेरो दावेदारी पार्टीभित्र कुन पदमा रहला ? तपाईं आफैँ अनुमान गर्न सक्नुहुन्छ,” उनले प्रष्ट संकेत गरे।
तर सिंहले कुनै पदकै लागि राजनीति नगरेको स्पष्ट पारे। उनले राजनीतिमा लाग्दा मुलुकमा असहज अवस्था रहेको, धरपकड, गिरफ्तारी, प्रतिबन्ध जस्ता अवस्था भोगेको उल्लेख गर्दै जनताका अधिकार र तानाशाही अन्त्यको अभियानका लागि संघर्षमा लागेको बताएका छन्।
“राजाले सत्ता लिएपछि त अवस्था अझ असहज बन्यो,” उनले स्मरण गरे, “जबजब प्रजातन्त्रमाथि प्रहार भयो, जनताका अधिकार खोसिए, सधैँ चुनौतीपूर्ण मोड आयो तर पार गर्न सफल भयौँ।”
सिंहले हाल संसद्मा उठिरहेको मुद्दाहरूलाई लिएर पनि टिप्पणी गरे। “संसद्को मर्यादा र गरिमा जोगाउने, जनताको संसद्प्रतिको भरोसा बढाउने र संसद्लाई प्रभावकारी बनाउने दायित्व सबै दलको हो,” उनले भने।
