काठमाडौं । वैदेशिक रोजगारीका नाममा ठगी गरेर फरार हुने व्यक्तिमाथि सरकारले आर्थिक नाकाबन्दीको तयारी गरेको छ। ठगीसम्बन्धी मुद्दामा पक्राउ पुर्जी जारी भएका तर सम्पर्कमा नआएका व्यक्तिको बैंक खाता रोक्का गर्ने प्रक्रिया अघि बढाइने भएको छ।
युवा, श्रम तथा रोजगारमन्त्री रामजी यादवका अनुसार वैदेशिक रोजगार विभागले फरार व्यक्तिहरूको विवरण संकलन गरी नेपाल राष्ट्र बैंकमा पठाउने तयारी गरेको छ। यसका लागि आगामी मंसिर १४ गते राष्ट्र बैंकलाई औपचारिक पत्र पठाइनेछ।
विभागले गत कात्तिक ९ गते सार्वजनिक सूचना जारी गर्दै वैदेशिक रोजगार ठगीसम्बन्धी मुद्दामा संलग्न भई फरार रहेका व्यक्तिलाई ३५ दिनभित्र विभाग वा नेपाल प्रहरीको सम्पर्कमा आउन आग्रह गरेको थियो। तोकिएको समयभित्र उपस्थित नभए उनीहरूको बैंक खाता तथा यात्रा अनुमतिसम्बन्धी प्रक्रिया रोक्का गर्ने चेतावनीसमेत दिइएको थियो।
सूचनाको म्याद पूरा भएपछि विभागले सम्पर्कमा नआएका व्यक्तिहरूको सूची तयार पार्न सम्बन्धित शाखालाई निर्देशन दिएको छ। उक्त सूची राष्ट्र बैंकमा पठाएर बैंक खाता रोक्का गर्ने प्रक्रिया अघि बढाइने मन्त्री यादवले बताएका छन्।
सरकारको यो कदमले वैदेशिक रोजगारीका नाममा रकम असुलेर फरार हुने व्यक्तिको आर्थिक कारोबार नियन्त्रण गर्ने र उनीहरूलाई कानुनी प्रक्रियामा ल्याउन सहयोग पुग्ने अपेक्षा गरिएको छ।
वैदेशिक रोजगार ठगीका घटनामा पीडितले रकम फिर्ता पाउन लामो समय कुर्नुपर्ने र अभियुक्त फरार हुँदा न्यायिक प्रक्रिया प्रभावित हुने समस्या छ। बैंक खाता रोक्का गर्ने प्रक्रियाले फरार व्यक्तिको आर्थिक गतिविधि नियन्त्रण गर्नुका साथै अनुसन्धान र कानुनी कारबाहीलाई प्रभावकारी बनाउन सक्ने सरकारको अपेक्षा छ।
मन्त्रालय र विभागले वैदेशिक रोजगार ठगी नियन्त्रण, पीडितलाई न्याय र ठगीमा संलग्नलाई कानुनी दायरामा ल्याउने उद्देश्यले यो प्रक्रिया अघि बढाएका हुन्।












