काठमाडौं । काठमाडौंको बूढानीलकण्ठ नगरपालिका–२, माथिल्लो भंगालमा घर भाडामा लिएर सुन प्रशोधन तथा तस्करी गर्ने गरेको खुलेको छ। प्रहरीले बिहीबार झण्डै २२ किलो सुनसहित तीन चिनियाँ नागरिकलाई पक्राउ गरेपछि उनीहरूको गतिविधिबारे थप विवरण सार्वजनिक भएको हो।
पक्राउ पर्नेमा चीनका झाउ लङक्विन, वाङ जियाङझेन र हान फेई छन्। उनीहरूबाट प्रहरीले कुल २१ हजार ७५०.६८ ग्राम अर्थात् झण्डै २२ किलो सुन बरामद गरेको थियो।
प्रहरीका अनुसार बरामद सुनमध्ये १ हजार ६०७.९५ ग्राम सुनका टुक्रा, ४ हजार ९८७.७४ ग्रामका पाँचवटा बिस्कुट आकारका ढिक्का, ३ हजार ९९२.४० ग्रामका चारवटा ढिक्का र २ हजार १७.७९ ग्रामका दुईवटा बिस्कुट आकारका ढिक्का छन्। त्यस्तै, प्लास्टिकसहित ६ हजार ३५१.८२ ग्राम लेसिलो धूलो र २ हजार ७९२.९८ ग्राम लेसिला टुक्रा पनि बरामद गरिएको छ।
प्रारम्भिक अनुसन्धानअनुसार उनीहरूले घरमै लेसिलो अवस्थामा रहेको अर्धतयारी सुनलाई प्रशोधन गरेर बजारमा लैजान मिल्ने अवस्थामा तयार पार्ने गरेका थिए। त्यसका लागि ड्रायर मेसिनमा राखेर सुन सुकाउने, मेल्टिङ मेसिनमा पगाल्ने र बिस्कुट आकारका साँचामा राखेर चिस्याउने गरिएको थियो।
प्रहरी अनुसन्धानअनुसार चिनियाँ नागरिक सु कानले गत जुलाई २४ मा बूढानीलकण्ठस्थित घर मासिक ३ लाख ३० हजार रुपैयाँ भाडा तिर्ने गरी चार महिनाका लागि लिएका थिए। उनले घरधनीलाई चार महिनाको अग्रिम भाडाबापत १३ लाख २० हजार रुपैयाँ बुझाएको खुलेको छ।
पासपोर्ट नम्बर पीए०२२३१८८ भएका सु कान गत अगस्ट १५ मा चीन गएको र हालसम्म नेपाल नफर्किएको प्रहरीले जनाएको छ। उनले चीनमा रहेका झेन जिया लीलाई भाडामा लिएको घरको चाबी दिएको अनुसन्धानबाट खुलेको छ।
लीले उक्त घरको चाबी हान फेई र झाउ लङक्विनलाई पठाएका थिए। उनीहरू सेप्टेम्बर २६ मा घरको चाबी लिएर नेपाल आएका थिए। प्रहरीका अनुसार हान फेई र झाउ लङक्विन सेप्टेम्बर २७ मा तथा सु कान अक्टोबर १ मा नेपाल आएका थिए।
घटनाबारे प्रहरीले थप अनुसन्धान गरिरहेको छ।
