काठमाडौं। चाडपर्वका सार्वजनिक बिदामा बैंकिङ ठगीका घटना भए तत्कालै कारबाही अघि बढाउन नेपाल राष्ट्र बैंकले बैंक तथा वित्तीय संस्था र प्रहरीबीच समन्वयको व्यवस्था मिलाउन निर्देशन दिएको छ।
अब बैंकहरूले शंकास्पद कारोबार पहिचान गरी रोक्का गर्न र अनुसन्धानका लागि आवश्यक विवरण उपलब्ध गराउन जिम्मेवार अधिकारी तोक्नुपर्नेछ।
नेपाल राष्ट्र बैंकले विजयादशमी, दीपावली तथा छठ पर्व, २०८३ लाई लक्षित गर्दै ‘क’, ‘ख’ र ‘ग’ वर्गका बैंक तथा वित्तीय संस्थालाई यस्तो निर्देशन दिएको हो।
राष्ट्र बैंकको निर्देशनअनुसार बैंक तथा वित्तीय संस्थाले साइबर ठगीसम्बन्धी घटनामा तत्काल समन्वय गर्न सक्ने सम्पर्क व्यक्ति ९फोकल पर्सन० तोक्नुपर्नेछ। उक्त व्यक्तिको नाम, पद र मोबाइल नम्बरका साथै २४ सै घण्टा निगरानी हुने ड्युटी वा अनकल इमेल ठेगाना नेपाल प्रहरी प्रधान कार्यालयलाई उपलब्ध गराउनुपर्नेछ।
बैंकहरूले उक्त विवरण नेपाल प्रहरी प्रधान कार्यालयको इमेल ठेगाना अदउष्ििबचद्द२लभउबउियष्अिभ।नयख।लउ मा पठाउनुपर्नेछ।
राष्ट्र बैंकले विद्युतीय माध्यमबाट हुने आर्थिक ठगीका घटनामा कारोबार विवरण समयमै उपलब्ध गराउन पनि निर्देशन दिएको छ। ठगीको आशंका भएका खाता तथा कारोबार पहिचान भएपछि तत्काल रोक्का गर्ने र अनुसन्धान प्रक्रियालाई सहज बनाउने व्यवस्था मिलाउनुपर्नेछ।
सार्वजनिक बिदाका समयमा बैंकका नियमित कार्यालय बन्द रहे पनि साइबर ठगीका घटनामा तत्काल समन्वय गर्नुपर्ने आवश्यकता हुन्छ। शंकास्पद कारोबारबारे जानकारी प्राप्त भए पनि सम्बन्धित बैंकका अधिकारीसँग सम्पर्क हुन नसक्दा अनुसन्धान र रकम रोक्का गर्ने प्रक्रियामा ढिलाइ हुन सक्ने जोखिम रहन्छ।
राष्ट्र बैंकको निर्देशनले यस्तो अवस्थामा बैंक र प्रहरीबीच सम्पर्क स्थापित गर्ने संयन्त्र तयार गर्न खोजेको छ। सम्पर्क अधिकारी र २४ घण्टा निगरानी हुने इमेलको विवरण उपलब्ध भएपछि ठगीसम्बन्धी सूचना आदानप्रदान तथा आवश्यक कारोबार विवरण प्राप्त गर्न सहज हुने अपेक्षा गरिएको छ।
विद्युतीय भुक्तानी र डिजिटल बैंकिङ सेवाको प्रयोग भइरहने चाडपर्वको समयमा शंकास्पद कारोबारलाई समयमै पहिचान गर्नु रकम थप स्थानान्तरण हुन नदिन महत्त्वपूर्ण हुन्छ। त्यसैले राष्ट्र बैंकले बैंकहरूलाई सम्पर्क व्यक्ति तोक्नेमात्र नभई कारोबार विवरण उपलब्ध गराउने, शंकास्पद खाता रोक्का गर्ने र प्रहरीको अनुसन्धानमा सहयोग गर्ने जिम्मेवारीसमेत स्मरण गराएको छ।
