काठमाडौं। चुनावको एक साता मात्रा बाँकी रहँदा दलहृरू अन्तिम कसरतमा छन्। अहिले घरदैलोदेखि चुनावी सभा गरिरहेका छन्।
तर, राजनीतिक दल वा उम्मेदवारको चुनावी प्रचारप्रसारमा अन्य कुनै राजनीतिक दल वा उम्मेदवार वा दलका कार्यकर्ता वा आम नागरिकले विभिन्न तरिकाले अवरोध सिर्जना गरेको उजुरी निर्वाचन आयोगमा पुगेको छ। आयोगका प्रवक्ता नारायणप्रसाद भट्टराईका अनुसार त्यसबाहेक विभिन्न सञ्चार माध्यमबाट समेत यस्ता विषयमा जानकारी भएकामा निर्वाचन आयोगको गम्भीर ध्यानाकर्षण भएको छ।
उनका अनुसार कुनै राजनीतिक दल, उम्मेदवार वा दलको भातृ संगठनले आयोजना गरेको जुलुस, आमसभा, कोणसभा, बैठक, भेला वा अन्य कार्यक्रम बिथोल्न वा कुनै प्रकारको बाधा अवरोध पुर्याउन पाइँदैन। निर्वाचनको प्रचारप्रसार गर्न वा मतदानको अधिकार प्रयोग गर्नबाट बञ्चित गर्ने उद्देश्यले वाधा अवरोध पुर्याउने वा पुर्याउन लगाउने वा थुनछेक गर्ने वा गराउनेलाई दुई लाख रुपैयाँसम्म जरिवाना वा तीन वर्षसम्म कैद वा दुबै सजाय हुने व्यवस्था छ।
‘आसन्न निर्वाचनलाई स्वतन्त्र, स्वच्छ, निष्पक्ष तथा भयमुक्त वातावरणमा सम्पन्न गराउने दायित्व राजनीतिक दल, उम्मेदवार, आम नागरिक तथा सरोकारवाला सबैको भएको हुँदा निर्वाचनसम्बन्धी प्रचलित संघीय कानुन बमोजिम निर्वाचनको प्रचारप्रसार गर्नबाट बञ्चित गर्ने उद्देश्यले वाधा अवरोध पुर्याउने वा पुर्याउन लगाउने वा थुनछेक गर्ने वा गराउने जस्ता कार्य नगर्नका लागि सम्बन्धित सरोकारवाला सबैलाई आयोग अनुरोध गर्दछ।सो विपरीत गरेको देखिएमा आचारसंहिता प्रतिकूल हुने व्यहोरा सरोकारवाला सबैमा जानकारी गराइन्छ,’ आयोगले भनेको छ।
