काठमाडौं। सरकारले नेपाली नागरिकको अवस्थाको निरन्तर अनुगमन गर्न मध्यपूर्वमा रहेका नेपाली दुतावासलाई निर्देशन दिएको छ। साथै उच्च सतर्कतामा रहन पनि भनेको छ।
आइतबार बसेको मन्त्रिपरिषद् बैठकपछि पत्रकारसँग कुराकानी गर्र्दै परराष्ट्रमन्त्री बालानन्द शर्माले मध्यपूर्वी देशाम तनाव बढ्दा नेपालको विमानस्थलमा देखिएका समस्या समाधान भइसकेको बताए।
प्रभावित क्षेत्रका लागि आधिकारिक ट्राभल एडभाइजरी जारी भइसकेको र ट्रान्जिटमा परेका नेपाली कामदार तथा उपचारका लागि गएका बिरामीहलाई परेको असुविधा सम्बन्धित देशस्थित नेपाली राजदूतावासहरूसँग समन्वय गरी गन्तव्यसम्म पुर्याउने व्यवस्था मिलाइएको उनले बताए।
‘नेपालबाट बाहिर जाने श्रमिकहरुलाई त्रिभुवन अन्तर्राष्ट्रिय विमानस्थलमा परेको समस्याको समाधान भइसकेको छ। श्रम मन्त्रालय, पर्यटन मन्त्रालय र परराष्ट्र मन्त्रालयले सहकार्य गरेको विमानस्थलमा देखिएको समस्याको समाधान गरिसकेको छ । ट्राभल एड्भाइजरीहरु प्रकाशन भइसकेका छन्,’ उनले भने।
त्यस्तै, सम्बन्धित मुलुकमा गएर ट्रान्जिटमा परेका नेपाली कामदार र प्यासेन्टलाई भएको असुविधाबारे पनि बैठकमा छलफल भएको शर्माले बताए। ‘उहाँहरुको सुविधाको लागि हरेक देशका राजदूतावासका राजदूतहरुसँग समन्वय गरेर गन्तव्यमा पुर्याउने तथा जान नसक्नेलाई सम्बन्धित कम्पनीले नै रेखदेख गर्नेगरी समन्वय भइसकेको छ,’ उनले भने।
उनले हालसम्म मध्यपूर्वमा रहेका नेपाली नागरिकमध्ये कसैको पनि हताहत नभएको र सुरक्षाका आवश्यक प्रबन्ध मिलाइसकिएको जानकारी गराए।
तनावग्रस्त मध्यपूर्वका १२ देशमा १७ लाख २९ हजार २८८ नेपाली नागरिक, कुन देशमा कति?
संयुक्त अरब इमिरेट्स : लगभग ७ लाख
साउदी अरब: ३ लाख ८४ हजार ८ सय ६५
कतार: ३ लाख ५७ हजार ९ सय १३
कुवेत: १ लाख ७५ हजार
इराक: ३० हजार
बहराइन: २८ हजार
ओमान: २५ हजार
साइप्रस: १७ हजार
इजरायल : ६५ सय
लेबनान: १५ सय
इजिप्ट: ५ सय
इरानमा: १० मा ४ फर्किसकेका
