काठमाडौं। प्रधानमन्त्री बालेन्द्र शाह (बालेन) ले रसुवा, नुवाकोट र गोरखालगायतका जिल्लामा भएको विपत्तिको शोकबीच यस वर्षको दसैँ आएको उल्लेख गर्दै विस्थापित नागरिकको पुनःस्थापनामा सरकार काम गरिरहेको बताएका छन्।
बडादसैँको शुभकामना सन्देश सार्वजनिक गर्दै प्रधानमन्त्री शाहले विपत्तिमा ज्यान गुमाएकाप्रति श्रद्धाञ्जली व्यक्त गरेका छन् भने घाइतेको शीघ्र स्वास्थ्यलाभको कामना गरेका छन्। उनले शोकसन्तप्त परिवारप्रति समवेदना व्यक्त गर्दै विस्थापित नागरिकको पुनःस्थापनाका लागि सरकारले तदारुकताका साथ काम गरिरहेको बताएका हुन्।
प्रधानमन्त्री शाहले सामाजिक सञ्जालमार्फत दिएको सन्देशमा दसैँलाई धार्मिक, सामाजिक तथा सांस्कृतिक महत्त्व बोकेको पर्वका रूपमा उल्लेख गरेका छन्। उनका अनुसार दसैँ पारिवारिक मिलन, आत्मीयता र आपसी सद्भावको अवसर पनि हो।
उनले भूकम्प, कोभिड महामारी र अघिल्लो वर्षको जेनजी आन्दोलनपछिको तनावपूर्ण अवस्थाका बीच पनि नेपालीले आफ्नो परम्परा र सांस्कृतिक मूल्यमान्यता जोगाउँदै चाडपर्व मनाउँदै आएको स्मरण गरेका छन्।
यस वर्ष पनि विभिन्न जिल्लामा भएका विनाशकारी घटनाको शोक ताजा रहँदै दसैँ आएको भन्दै उनले विपत्तिमा प्रभावित परिवारप्रति समवेदना व्यक्त गरेका छन्।
विदेशिने नेपालीको पीडा बदल्ने प्रतिबद्धता
प्रधानमन्त्री शाहले दसैँका बेला परिवारसँग भेटघाट गर्न चाहँदाचाहँदै पनि आर्थिक तथा अन्य बाध्यताका कारण घर फर्कन नसक्ने नेपालीको अवस्थालाई पनि आफ्नो सन्देशमा समेटेका छन्।
उनले रोजगारी र जीविकोपार्जनका लागि विदेशिनुपर्ने नेपालीको पीडा तथा चाडपर्वमा समेत परिवारसँग मिलन हुन नपाउने अवस्थालाई बदल्न सबैको हातेमालो आवश्यक रहेको बताएका छन्।
‘हरेक दिन बाध्यताले विदेशिनुपर्ने दाजुभाइ तथा दिदीबहिनीहरूको पीडा र चाडपर्वका अवसरमा पारिवारिक मिलनका लागि घर फर्कने चाहना हुँदाहुँदै पनि फर्कन नपाई परदेशमा रित्तो निधार लिएर बस्न बाध्य हुनुपर्ने लाखौँ नेपाली दिदीबहिनी तथा दाजुभाइहरूको नियति बदल्न हामी सबैको हातेमालोबाट सम्भव छ,’ उनले भनेका छन्।
सरकार देशको समृद्धि र आमनागरिकको सुखद जीविकाप्रति प्रतिबद्ध रहेको पनि उनले उल्लेख गरेका छन्।
आर्थिक अभावले दसैँ बोझ बन्न नहुने
प्रधानमन्त्री शाहले आर्थिक सम्पन्नताले नै चाडपर्वको रौनक बढाउने उल्लेख गर्दै आर्थिक अभावका कारण दसैँजस्तो महान् पर्व कसैका लागि बोझ बन्न नहुने बताएका छन्।
उनले देशलाई सुशासनको मार्गमा अघि बढाउन र नागरिकको आर्थिक समृद्धिका लागि वर्तमान सरकार सक्रिय रहेको दाबी गरेका छन्।
दसैँलाई असत्यमाथि सत्य र आसुरी प्रवृत्तिमाथि दैवी शक्तिको विजयको प्रतीकका रूपमा व्याख्या गर्दै उनले समाजमा खराब प्रवृत्तिको अन्त्य र व्यक्तिमा सकारात्मक परिवर्तन आवश्यक रहेको बताएका छन्।
उनले काम, क्रोध, लोभ, ईर्ष्या र अहङ्कारमाथि विजय प्राप्त गर्न सबैलाई शुभकामना दिएका छन्।
प्रधानमन्त्री शाहले बडादसैँका अवसरमा देश तथा विदेशमा रहेका सम्पूर्ण नेपालीलाई सुख, शान्ति, आरोग्य र समृद्धिको शुभकामना दिँदै सभ्य र भव्य रूपमा चाड मनाउन आग्रह गरेका छन्।
