काठमाडौं। प्रधानमन्त्री वालेन्द्र शाह (बालेन)ले नेपाल टेलिकमको चाडपर्व लक्षित इन्टरनेट प्याकेज सार्वजनिक प्रचारमा ल्याएका छन्।
उनले शुक्रबार बिहान फेसबुकमा टेलिकमको अफरसम्बन्धी प्रचार सामग्री सेयर गर्दै वार्षिक ४ हजार ९९९ रुपैयाँमा ३० एमबीपीएस गतिको इन्टरनेट उपलब्ध हुने जानकारी दिएका हुन्।
नेपाल टेलिकमले दसैँ, तिहार तथा छठलाई लक्षित गरी फाइबर इन्टरनेट, मोबाइल डेटा, भ्वाइस र एसएमएसका विभिन्न प्याकेज समेटेर फेस्टिभ अफर ल्याएको छ। कम्पनीले इन्टरनेट सेवाको वार्षिक शुल्कलाई विभिन्न गति र मूल्यअनुसार वर्गीकरण गरेको छ।
प्रधानमन्त्री शाहले सेयर गरेको पोस्टरमा ‘बजेटमै फिट, स्पिडमा हिट१ मात्र रु ४,९९९ मा वर्षभरि इन्टरनेट१’ उल्लेख छ। सेवा जडानका लागि १९८ मा फोन गर्न सकिने जानकारी पनि पोस्टरमा दिइएको छ।
वार्षिक प्याकेजमा गति र शुल्कअनुसार विकल्प
टेलिकमको अफरमा ३० एमबीपीएस गतिको इन्टरनेट १२ महिनाका लागि ४ हजार ९९९ रुपैयाँमा उपलब्ध छ। त्यस्तै, १०० एमबीपीएसको वार्षिक शुल्क ११ हजार ४९९ रुपैयाँ, १५० एमबीपीएसको १२ हजार ९९९ रुपैयाँ र २०० एमबीपीएसको १६ हजार ४९९ रुपैयाँ तोकिएको छ।
कम्पनीले नयाँ एफटीटीएच जडानमा ५०० रुपैयाँ शुल्क मिनाहा गर्ने व्यवस्था पनि गरेको छ। असोज २५ देखि कात्तिक ३० सम्म लागू हुने यो सुविधा नयाँ जडान गर्ने ग्राहकका लागि हो।
१००, १५० र २०० एमबीपीएसका वार्षिक प्याकेज लिने नयाँ ग्राहकले १२ महिनाको शुल्कमा १३ महिना सेवा पाउने व्यवस्था गरिएको छ। वार्षिक प्याकेजसँगै मोबाइल डेटा बोनस उपलब्ध हुने व्यवस्था पनि कम्पनीले गरेको छ।
टेलिकमले चाडपर्वलाई लक्षित गरी सार्वजनिक गरेका प्याकेजमा ग्राहकले आफ्नो आवश्यकता र बजेटअनुसार इन्टरनेटको गति तथा सेवा अवधि छनोट गर्न सक्नेछन्।
