काठमाडौं। राष्ट्रिय स्वतन्त्र पार्टी (रास्वपा) ले सांसद खगेन्द्र सुनारमाथि छानबिन थालेको छ। र, उनलाई सार्वजनिक कार्यक्रममा सहभागी नहुन निर्देशन दिएको छ।
एक महिलालाई धम्की दिएको, ब्ल्याकमेलिङ गरेको तथा शंकास्पद आर्थिक लेनदेनसम्बन्धी आरोप सार्वजनिक भएपछि पार्टीले आन्तरिक छानबिन नसकिएसम्म उनलाई औपचारिक कार्यक्रममा सहभागी हुन रोक लगाएको हो।
रास्वपाका महामन्त्री विपिन आचार्यले मंगलबार जारी गरेको विज्ञप्तिमा सुनारसँग सम्बन्धित समाचार, सार्वजनिक भएका श्रव्य सामग्री र उनीमाथि उठेका गम्भीर प्रश्नप्रति पार्टीको ध्यानाकर्षण भएको जनाएका छन्।
पार्टीले घटनाको सत्यतथ्य पत्ता लगाउन केन्द्रीय अनुशासन आयोगलाई तत्काल आन्तरिक छानबिन प्रक्रिया अघि बढाउन निर्देशन दिएको छ। छानबिनको निष्कर्ष नआएसम्म अनुसन्धान प्रभावित हुन नदिन र पदीय नैतिकता कायम राख्न सुनारलाई सार्वजनिक पदको हैसियतमा कुनै पनि औपचारिक कार्यक्रममा सहभागी नहुन भनिएको विज्ञप्तिमा उल्लेख छ।
‘यस विषयको सत्यतथ्य अन्वेषण गर्न पार्टीको केन्द्रीय अनुशासन आयोगलाई तत्काल आन्तरिक छानबिन प्रक्रिया अगाडि बढाउन निर्देशन दिइसकिएको छ,’ विज्ञप्तिमा भनिएको छ, ‘अनुसन्धान प्रक्रिया प्रभावित नहोस् र पदीय नैतिकता कायम रहोस् भन्नका खातिर, उक्त छानबिन निष्कर्षमा नपुग्दासम्मका लागि उहाँलाई सार्वजनिक पदको हैसियतमा कुनै पनि औपचारिक कार्यक्रममा सहभागी नहुन निर्देशन दिइन्छ।’
रास्वपाले महिलाको मर्यादा र सम्मानमा आँच पुर्याउने कार्य, अनुचित दबाब तथा अवाञ्छित धम्कीसम्बन्धी आरोपलाई गम्भीर र संवेदनशील रूपमा लिएको जनाएको छ। विधिको शासन, सुशासन र नागरिक जवाफदेहिताको पक्षमा उभिएको पार्टीले आफ्ना सदस्य वा जनप्रतिनिधिमाथि लाग्ने यस्ता आरोपलाई सामान्य रूपमा लिन नसक्ने स्पष्ट पारेको छ।
महिलामाथि हुने दुर्व्यवहार, पदीय मर्यादाको उल्लङ्घन तथा फौजदारी कसुरका विषयमा पार्टीको शून्य सहनशीलताको नीति रहेको विज्ञप्तिमा उल्लेख छ।
सुनारमाथि लागेका आरोपबारे छानबिन गर्न राज्यका सम्बन्धित निकायलाई समेत सहयोग गर्ने रास्वपाले जनाएको छ। यद्यपि, पार्टीको आन्तरिक छानबिन र राज्यका निकायबाट हुने अनुसन्धानबाट आरोपको सत्यतथ्य पुष्टि हुन बाँकी छ।
