तीन दिन वर्षा र हिमपातको सम्भावना, सतर्कता अपनाउन महाशाखाको आग्रह

काठमाडौँ। जल तथा मौसम विज्ञान विभाग, मौसम पूर्वानुमान महाशाखाले आगामी तीन दिन देशभर आंशिकदेखि साधारणतया बदली रही धेरैजसो स्थानमा मेघगर्जन र चट्याङसहित वर्षाको सम्भावना रहेको जनाएको छ।

हाल नेपालमा पश्चिमी वायु, स्थानीय वायु र पूर्वी भू(भाग नजिक रहेको न्यून चापीय क्षेत्रको संयुक्त प्रभाव देखिएको छ।

आज मंगलबार कोशी र गण्डकी प्रदेश लगायत देशका पहाडी भूभागका केही स्थानमा मध्यम वर्षाको सम्भावना छ। राति पनि कोशी, मधेश र बागमती प्रदेशका थोरै स्थानमा मेघगर्जनसहित पानी पर्ने सम्भावना रहेको महाशाखाले जनाएको छ।

बुधबार वर्षाको प्रभाव अझ बढ्ने देखिएको छ। कोशी, मधेश, बागमती, गण्डकी र लुम्बिनी प्रदेशका धेरैजसो स्थानमा मेघगर्जन र चट्याङसहित मध्यम वर्षा र हिमाली भूभागमा हिमपातको प्रक्षेपण गरिएको छ।
बिहीबार भने सुदूरपश्चिम, कर्णाली र लुम्बिनी प्रदेशमा वर्षाको प्रभाव बढी रहनेछ। तराईका केही स्थानमा पनि हल्का वर्षाको सम्भावना रहेकाले गर्मीबाट केही राहत मिल्ने देखिए तापनि चट्याङको जोखिम भने कायमै रहनेछ।

वर्षा, मेघगर्जन र चट्याङ्गका कारण जनस्वास्थ्य, कृषि, यातायात र पर्यटन क्षेत्रमा पर्न सक्ने असरबाट बच्न आवश्यक सतर्कता अपनाउन महाशाखाले अनुरोध गरेको छ। विशेष गरी पहाडी र हिमाली क्षेत्रमा यात्रा गर्नेहरूलाई मौसमको अवस्था हेरेर मात्र अघि बढ्न सुझाव दिइएको छ।