काठमाडौं। त्रिभुवन विश्वविद्यालय (त्रिवि) व्यवस्थापन संकायअन्तर्गत मास्टर्स अफ बिजनेस स्टडिज (एमबीएस) प्रथम सत्रको प्रश्नपत्र परीक्षा सुरु भएको केही मिनेटमै बाहिरिएको घटनामा प्रहरीले दुई जनालाई नियन्त्रणमा लिएको छ।
नेपाल प्रहरीको केन्द्रीय अनुसन्धान ब्युरो (सिआइबी)ले आरोपितहरूलाई नियन्त्रणमा लिएर आवश्यक अनुसन्धान अगाडि बढाएको जानकारी दिएको छ।
गत साउन ८ गते स्नातकोत्तर तहको ‘अर्गनाइजेसनल बिहेबियर’ विषयको परीक्षा सञ्चालन भइरहेको थियो। परीक्षा सुरु भएको ५ मिनेटभित्रै ‘एमबीएस फ्रस्ट सेम सेक्सन सी’ नाम दिइएको ह्वाट्सएप ग्रुपमार्फत प्रश्नपत्र सार्वजनिक गरिएको प्रहरीको प्रारम्भिक निष्कर्ष छ।
प्रश्नपत्र बाहिरिएपछि सामाजिक सञ्जाल फेसबुक पेज ‘टियु स्टुडेन्ट्स’ ले ह्वाट्सएप ग्रुपका स्क्रिनसटसहित त्रिवि प्रशासनको ध्यानाकर्षण गराएको थियो। घटनालगत्तै व्यवस्थापन संकाय डिनको कार्यालयले अनुसन्धानका लागि प्रहरीको साइबर ब्युरोलाई पत्राचार गरेको थियो।शिक्षामन्त्री र आईजीपीबीच रातभर परामर्शप्रश्नपत्र बाहिरिएको समाचार बाहिरिएपछि शिक्षा तथा खेलकुद मन्त्री सस्मित पोखरेल र नेपाल प्रहरीका महानिरीक्षक दानबहादुर कार्कीबीच मन्त्रालयमै छलफल भएको थियो।
मन्त्री पोखरेलले प्रहरीका उच्च अधिकारीका साथै त्रिविका पदाधिकारीहरूसँग परामर्श गरी सत्यतथ्य छानबिनका लागि निर्देशन दिएका थिए। सोही निर्देशन र तत्परतापछि आइतबार बिहानै प्रहरीले संलग्नताको आशङ्कामा केही व्यक्तिलाई नियन्त्रणमा लिन सफल भएको हो।
३ सदस्यीय छानबिन समिति गठन
यसैबीच परीक्षा नियन्त्रण महाशाखाले घटनाको निष्पक्ष छानबिन गर्न तीन सदस्यीय समिति गठन गरेको छ।
प्राडा अच्युत ज्ञवालीको संयोजकत्वमा गठित समितिमा अनुगमन निर्देशनालयका उपनिर्देशक सहप्राध्यापक डा पुष्कर रैखला र केन्द्रीय परीक्षा सञ्चालक समितिका सदस्य सहप्राध्यापक डा महेशराज ओझा सदस्य छन्। उक्त समितिलाई सम्पूर्ण घटनाको सत्यतथ्य निरूपण गरी सात कार्यदिनभित्र प्रतिवेदन पेस गर्ने कार्यादेश दिइएको छ।
