काठमाडौं । त्रिभुवन विश्वविद्यालय (त्रिवि)ले नयाँ शैक्षिक सत्रका लागि ‘शैक्षिक क्यालेण्डर’ सार्वजनिक गरेको छ। यस क्यालेण्डरअनुसार स्नातक तह वार्षिक परीक्षा र सेमेष्टर प्रणाली तथा स्नातकोत्तर तह सेमेष्टर प्रणालीको कक्षा सञ्चालन, परीक्षा र परीक्षाफलको कार्यतालिका तोकिएको छ।
त्रिविका शिक्षाध्यक्ष प्रा.डा. खड्ग केसीले प्राज्ञिक परिषद्को निर्णयअनुसार क्यालेण्डर सार्वजनिक गरिएको जानकारी दिए। उनले भने, समयमा कक्षा सञ्चालन, परीक्षा र परीक्षाफल प्रकाशन सुनिश्चित गर्न क्यालेण्डर आवश्यक रहेको छ। यस अनुसार त्रिविका ६४ आङ्गिक क्याम्पस र ४४ केन्द्रीय निकायले क्यालेण्डरअनुसार काम गर्न निर्देशन पाइसकेका छन्।
त्रिविले स्नातक तहको चार वर्षे वार्षिक कार्यक्रम, आठ सेमेष्टर प्रणाली र स्नातकोत्तर तहका चार सेमेष्टरको क्यालेण्डर बनाएको छ। स्नातक तह सेमेष्टर प्रणालीका लागि भर्ना फारम कात्तिकसम्म बुझाउने, प्रवेश परीक्षा, भर्ना र कक्षा सञ्चालन मङ्सिरमा गर्ने निर्णय भएको छ।
स्नातक तहका आठ सेमेष्टरको क्यालेण्डर अनुसार प्रथम सेमेष्टरको परीक्षा २०८२ चैतभित्र हुनेछ र परीक्षाफल २०८२ असारमा प्रकाशित हुनेछ। आठ सेमेष्टरको कक्षा सञ्चालन २०८६ माघमा, परीक्षा २०८७ जेठमा र परीक्षाफल २०८७ भदौमा प्रकाशन गर्ने योजना छ।
वार्षिक कक्षाका लागि भर्ना साउनदेखि मङ्सिरसम्म, कक्षा सञ्चालन मङ्सिरदेखि, परीक्षा फारम २०८३ वैशाखमा, परीक्षा २०८३ साउनमा र परीक्षाफल २०८३ कात्तिकमा प्रकाशित हुने क्यालेण्डरमा उल्लेख गरिएको छ। चार वर्षे वार्षिक कक्षा २०८५ चैतमा सकिने लक्ष्य राखिएको छ। चौथो वर्षको कक्षा सञ्चालन २०८४ चैतमा सुरु हुने, परीक्षा पुसमा र परीक्षाफल चैतमा प्रकाशित हुने क्यालेण्डरमा उल्लेख छ।
स्नातकोत्तर तहको सेमेष्टर प्रणाली अन्तर्गत पहिलो सेमेष्टरको भर्ना फारम मङ्सिरमा वितरण, प्रवेश परीक्षा पुसमा, कक्षा सञ्चालन माघदेखि, परीक्षा जेठमा र परीक्षाफल २०८३ भदौमा प्रकाशित हुने तालिका तय गरिएको छ। २०८२ सालमा भर्ना भएका विद्यार्थी २०८४ मङ्सिरमा अध्ययन पूरा गर्नेछन्। चौथो सेमेष्टरको कक्षा सञ्चालन २०८४ वैशाखमा, परीक्षा भदौमा र परीक्षाफल मङ्सिरमा प्रकाशित हुनेछ।
