एजेन्सी । टेक अर्बपति एलन मस्कले पूर्वराष्ट्रपति डोनाल्ड ट्रम्प नेतृत्वको रिपब्लिकन पार्टीप्रति तीव्र असन्तुष्टि जनाउँदै नयाँ राजनीतिक दल खोल्ने चेतावनी दिएका छन्। अमेरिकी सिनेटमा विवादास्पद ‘बृहत खर्च विधेयक’ पारितको पूर्वसन्ध्यामा मस्कले यस्तो धमाकेदार अभिव्यक्ति दिएका हुन्।
मस्कले सामाजिक सञ्जाल एक्स (पूर्व ट्विटर) मा लेखेका छन्, “सरकारी खर्च घटाउने नारा लगाउने अनि इतिहासकै सबैभन्दा ठूलो ऋण वृद्धिको पक्षमा मतदान गर्ने? यस्ता सांसदहरूलाई लाज हुनुपर्छ। यदि यो पृथ्वीमा मैले गर्ने अन्तिम काम पनि हो भने, म नयाँ पार्टी खोलेर उनीहरूलाई अर्को निर्वाचनमा हराउन लाग्नेछु।”
उनले प्रस्तावित नयाँ पार्टीको नाम ‘अमेरिका पार्टी’ हुने उल्लेख गर्दै यदि उक्त विधेयक पारित भयो भने पार्टी भोलिपल्टै सुरु हुने बताएका छन्।
पूर्वराष्ट्रपति ट्रम्पले मस्कको घोषणालाई व्यंग्यात्मक ढंगले लिँदै ट्रुथ सोसियलमार्फत प्रतिक्रिया दिएका छन्। “इतिहासमा कुनै पनि मानिसले एलनभन्दा बढी सरकारी अनुदान पाएको छैन। यदि त्यो अनुदान हटाइयो भने, ऊ दक्षिण अफ्रिका फर्किन बाध्य हुनेछ,” ट्रम्पले लेखेका छन्।
गत अमेरिकी निर्वाचनमा मस्कले ट्रम्प र रिपब्लिकन उम्मेदवारहरूलाई झण्डै २७५ मिलियन डलर सहयोग गरेका थिए। तर हाल मस्कले रिपब्लिकनहरूलाई जनविरोधी नीति अँगालेको आरोप लगाएका छन्।
राजनीतिक विश्लेषकहरूले मस्कको चेतावनीलाई अमेरिकी राजनीतिमा वैकल्पिक शक्ति उदाउने संकेतको रूपमा लिएका छन्। यद्यपि, मस्कले अमेरिका पार्टीको संरचना, नेतृत्व वा नीति अझै सार्वजनिक गरिसकेका छैनन्।
