काठमाडौं । काठमाडौं टोखामा विष्णुमति खोलाको बाढीमा कारसहित बगेकी एक महिलाको सकुशल उद्धार भएको छ ।
दाङ तुलसीपुर घर भई हाल टोखा बस्दै आएकी ३४ वर्षीया भावना ओली ग्राण्डी अस्पताल नजिकबाट खोलाले बगाएको कारभित्र थिइन्। बानियाटार पुल नजिक उक्त कार अड्किएपछि उनलाई नेपाल प्रहरी र स्थानीय मिलेर सकुशल उद्धार गरेका हुन्।
बाग्मती प्रदेश ०३१ च ६१४१ नम्बरको ईभी कार गएराति करिब १० बजे खोलामा पसेको थियो। कार चलाइरहेका कञ्चनपुर शुक्लाफाँटा नगरपालिका–१ घर भई हाल काठमाडौं धुम्बाराही बस्ने ३५ वर्षीय अंकुश सिंह भने समयमै गाडीबाट हाम फालेर ज्यान जोगाउन सफल भएका थिए।
उद्धारपछि भावना ओली र उद्धारमा संलग्न घाइते दुई जनालाई बसुन्धरास्थित ग्रिनसिटी अस्पतालमा उपचार गरिएको छ। उनीहरूको अवस्था सामान्य रहेको काठमाडौं प्रहरी परिसरका प्रवक्ता अपिलराज बोहराले जानकारी दिए।
उद्धार कार्यमा प्रहरी हबल्दार उमेश कुमार लोहनी, सहायक हबल्दार समिर विक, जवान सुमन थापा, लम्जुङ घर भई टोखा बस्ने १९ वर्षीय अर्जुन गुरुङ र २९ वर्षीय राजु तामाङ सहभागी थिए। उद्धारका क्रममा अर्जुनको खुट्टा र राजुको हातमा सामान्य चोट लागेको छ।
प्रहरी नायव उपरीक्षक निरन्जन थापाको नेतृत्वमा २० जना र विपद् व्यवस्थापन प्रहरी कार्यालयबाट थप २५ जनाको टोली परिचालन गरिएको थियो। खोलामा बगेको कार राति पौने १२ बजे क्रेनको सहायताले निकालिएको हो। हाल उक्त कार नयाँ बसपार्कस्थित प्रहरी प्रभागमा राखिएको छ।
