काठमाडौं। सरकारले शनिबार र आइतबार गरी दुई दिनमा थापाथलीसहित काठमाडौंका सुकुमबासी वस्ती हटाएर अतिक्रमित जमिन खाली गराउने तयारी गरेका बेला संयुक्त राष्ट्रिय सुकुम्बासी मोर्चाका कार्यवाहक अध्यक्ष नारायण परिश्रमी पक्राउ परेका छन्। उनी शुक्रबार पक्राउ परेका हुन्।
यसअघि काठमाडौं महानगरपालिकाले थापाथली, मनोहरा र सिनामंगल क्षेत्रमा माइकिङ गरेर अवैध रूपमा बनाइएका घरटहरा शुक्रबार साँझ ७ बजेभित्र खाली गर्न भनेको छ।
त्यस्तै, घरटहरामा भएका आफ्ना सरसामान, लत्ता कपडा, घरपालुवा, पशुपंक्षी सुरक्षित स्थानमा तत्काल सार्ने व्यवस्था गर्न, घर–टहराहरूमा बसोबास गर्ने अपांगता भएका, साना बालबालिका, गर्भवती, सुत्केरी, वृद्धवृद्धा एवं बिरामीहरूलाई प्राथमिकता दिई अन्यत्र सार्न पनि महानगरले भनेको छ। यसका लागि काठमाडौं महानगरीय प्रहरी, नेपाल प्रहरी र सशस्त्र प्रहरी बलको समेत मद्दत लिन अनुरोध गरिएको छ।
सरकारले शनिबार बिहान ६ बजेदेखि घर–टहराहरू भत्काउने तयारी गरेको छ।
