काठमाडौं । नेपाल स्केटिङ्ग तथा स्केट बोर्डिङ संघ, बाग्मती प्रदेश समिति गठन भएको छ । पाटन क्याम्पस, ललितपुरमा आयोजित प्रथम तथा ऐतिहासिक अधिवेशनले रसुवाका इञ्जिनियर प्रकाश श्रेष्ठको अध्यक्षतामा १९ सदस्यीय समिति गठन गरेको छ । समितिको वरिष्ठ उपाध्यक्ष समन घिमिरे, उपाध्यक्षहरू सुमन कट्टेल, सन्तोष सापकोटा, र विकास लामा रहेका छन् ।
महासचिवमा साजन देउजा, सचिवमा बिमल कार्की, सह–सचिवमा माइकल प्रजा, र कोषाध्यक्षमा अनिश बानियाँ चयन भएका छन्। अन्य सदस्यहरूमा राम दाहाल, सफल तामाङ, शंकर तिवारी, आरती लामा, बिपिन कुइकेल, रमेश कुमार कार्की, बिनोद महर्जन, रिमा रसाइली, बिभुशा बजगाईं, र सन्जिब भट्टराई रहेका छन्।
केन्द्रीय सचिव दिनेश बजगाईंका अनुसार, समिति अब प्रादेशिक संरचनामा विस्तार भइसकेको छ भने प्रत्येक जिल्लामा यसको विस्तार गर्ने योजनासहित खेल मैदान निर्माणमा जुट्नेछ ।
प्रदेश खेलकुद विकास परिषद, बाग्मती प्रदेशका सदस्य सचिव सूर्य लाल भण्डारीको प्रमुख आतिथ्य तथा सदस्य धन कुमार मैनालीको विशेष आतिथ्यतामा भएको कार्यक्रममा स्केटिङ्ग तथा स्केट बोर्डिङ साहसिक खेल भएकोले अन्तर्राष्ट्रिय जगतलाई समेत केन्द्रित गर्न सकिने र नेपालले यसमा अग्रसरता लिनुपर्नेमा जोड दिइएको थियो ।
नेपालमा यो खेल नयाँ भएकाले केही चुनौतीहरू भए तापनि यसको आकर्षण र फाइदाका कारण यसको सम्भाव्यता र विकासमा लाग्नुपर्नेमा विशेष जोड दिइएको थियो।
कार्यक्रममा संघका केन्द्रीय अध्यक्ष अच्युत खनाल, सचिव दिनेश बजगाईं लगायतका विशिष्ट व्यक्तिहरूको समेत उपस्थिति रहेको थियो।
हालसम्म ५ वटा प्रदेश र ४४ वटा जिल्लामा प्रादेशिक संरचना निर्माण भइसकेको छ । आगामी दिनमा हरेक जिल्लामा स्केटिङ्ग र स्केट बोर्डिङका लागि खेल मैदानहरूको निर्माण गर्ने योजना रहेको संघले जनाएको छ ।
अध्यक्ष इ.श्रेष्ठले गोसाइकुण्ड क्षेत्रमा राष्ट्रिय र अन्तर्राष्ट्रिय आइस स्केटिङ प्रतियोगिता आयोजना गर्ने आफ्नो रुचि र योजना रहेको बताए । उनका अनुसार, गोसाइकुण्डको प्राकृतिक सुन्दरता र चिसो वातावरणले यस्तो प्रतियोगिता आयोजना गर्न उपयुक्त स्थान प्रदान गर्दछ, जसले पर्यटन प्रवर्द्धनमा पनि योगदान पुर्याउनेछ।
यो अधिवेशनले नेपालमा स्केटिङ्ग र स्केट बोर्डिङ खेलको भविष्यलाई उज्ज्वल बनाउने र अन्तर्राष्ट्रिय स्तरमा पनि प्रतिस्पर्धा गर्न सक्ने खेलाडीहरूको उत्पादन गर्ने लक्ष्य राखेको छ । विभिन्न क्षेत्रका प्रतिनिधिहरूको सहभागिता र सुझावहरूले यो खेललाई अझ प्रभावकारी बनाउन मद्दत गर्ने अपेक्षा गरिएको छ ।
