काठमाडौं । सशस्त्र प्रहरीको केन्द्रीय स्टोरमा भएको आगलागी घटनामा डिआइजीसम्मका अधिकारीलाई कारबाही हुने भएको छ । छानबिन समितिको प्रतिवेदनका आधारमा सशस्त्र प्रहरी प्रधान कार्यालयले डिआईजी पुरुषोत्तम थापासहितका अधिकारीलाई कारबाही गर्न लागेको हो ।
गत २७ चैतमा बलम्बुस्थित सशस्त्र प्रहरीको केन्द्रीय स्टोरमा भीषण आगलागी हुँदा २० करोडभन्दा धेरैको क्षति भएको थियो । सो स्टोरको सुरक्षा जिम्मेवारी पशुपतिनाथ बाहिनीको थियो । त्यतिवेला डिआइजी थापा बाहिनीपति थिए ।
बाहिनीको कमान्डले समयमा सक्रियता नदेखाउँदा धेरै क्षति भएको भन्दै उनलाई पनि कारबाही हुन लागेको छ । गृह मन्त्रालयले गठन गरेको सहसचिव भरतमणि पाण्डे नेतृत्वको समितिले बाहिनी कमान्डको समेत कमजोरी औँल्याउँदै कारबाही गर्न सिफारिस गरेको थियो ।
त्यस्तै, सशस्त्रको केन्द्रीय स्टोरका प्रमुख एसपी राजेन्द्र श्रेष्ठमाथि पनि कारबाही हुन लागेको छ । स्टोर प्रमुखको समेत लापरबाहीले आगलागी भएको छानबिन समितिको प्रतिवेदनमा उल्लेख छ । यसअघि नै श्रेष्ठसहित स्टोर शाखाका सबै सशस्त्र प्रहरीलाई प्रधान कार्यालयले जिम्मेवारीबाट हटाइसकेको छ । आगलागीमा परी सशस्त्र प्रहरीका कर्मचारीका जुत्ता, कपडालगायतका सामान जलेका थिए ।
