काठमाडौं । सातौं संस्करणको साफ महिला च्याम्पियनसिप २०२४ नेपालमै हुने भएको छ । दक्षिण एसियाली फुटबल फेडेरेसन (साफ) ले प्रतियोगिता नेपालमा हुने घोषणा गरेको हो ।
सोमबार बसेको साफ प्रतियोगिता समितिको बैठकले साफ महिला च्याम्पियनसिप २०२४ को आयोजक नेपाललाई स्वीकृत गरेको हो । प्रतियोगिता अक्टोबर १७ देखि ३० सम्म काठमाडौंको दशरथ रंगशालामा हुने तय भएको छ । प्रतियोगितामा साफका सातै सदस्य संघको सहभागिता रहने साफले जनाएको छ ।
