काठमाडौं। सरकारले विदेशमा रहेका नेपालीको पुँजीसँगै ज्ञान, सीप र प्रविधि नेपाल भित्र्याउने रणनीति अघि बढाएको छ।
अर्थमन्त्री डा. स्वर्णिम वाग्लेले प्रवासी नेपालीलाई लगानीका लागि आह्वान गर्दै परम्परागत क्षेत्रभन्दा बाहिर सूचना प्रविधि, एआई, हरित ऊर्जा, उच्च मूल्ययुक्त कृषि र रुग्ण उद्योगको पुनरुत्थानसम्म लगानी तथा सीप परिचालन गर्न आग्रह गरेका हुन्।
चीनको ग्वाङझाउमा शनिबारदेखि सुरु भएको गैरआवासीय नेपाली संघ (एनआरएनए) को ११औँ एसिया प्यासेफिक सम्मेलनलाई भिडियो सन्देशमार्फत सम्बोधन गर्दै अर्थमन्त्री वाग्लेले नेपालले अब प्रवासी नेपालीलाई केवल रेमिट्यान्सको स्रोतका रूपमा नभई आर्थिक रूपान्तरणका साझेदारका रूपमा जोड्न खोजेको बताए।
उनले पर्यटन, सूचना प्रविधि, हरित ऊर्जा, उच्च मूल्ययुक्त कृषि तथा आयात प्रतिस्थापन हुने क्षेत्रमा लगानी गर्न प्रवासी नेपालीलाई आग्रह गरे। एआई र सूचना प्रविधिमा काम गर्ने वातावरण बनाउन सरकारले नीतिगत रणनीति अघि बढाइरहेको उनको भनाइ छ।
वाग्लेका अनुसार नेपालको आर्थिक विकासका लागि आन्तरिक स्रोतसँगै गैरआवासीय नेपालीको पुँजी र ज्ञान महत्वपूर्ण छ। त्यसैले सरकारले डायस्पोराको लगानी मात्र नभई उनीहरूले विदेशमा हासिल गरेको ज्ञान, सीप र अनुभवसमेत नेपालमा उपयोग गर्ने नीति लिएको छ।
यसैअनुसार धितोपत्र बाँडफाँड तथा निष्कासनसम्बन्धी नियमावली संशोधन गरी नेपाल सरकार र एनआरएन इन्भेस्टमेन्ट फण्डबाट जारी हुने सेयरको हिस्सा ८५ प्रतिशत पुर्याइएको उनले जानकारी दिए।
यो व्यवस्थालाई प्रवासी नेपालीको पुँजीलाई औपचारिक लगानीको माध्यमबाट नेपालमा परिचालन गर्ने सरकारको प्रयासका रूपमा अर्थमन्त्रीले प्रस्तुत गरे।
सरकारले लामो समयदेखि समस्यामा रहेका रुग्ण उद्योग पुनः सञ्चालन गर्ने नीति अघि बढाएको छ। यस्ता उद्योगलाई पुनरुत्थान गर्न विदेशमा रहेका नेपालीको व्यवस्थापकीय ज्ञान, प्राविधिक सीप र अनुभव उपयोग गर्न सकिने अर्थमन्त्री वाग्लेको संकेत छ।
उनले विदेशमा रहेका ज्ञान तथा सीप भएका नेपालीलाई रुग्ण उद्योगको पुनरुत्थानमा सहभागी हुनसमेत आग्रह गरे।
अर्थमन्त्री वाग्लेले सरकारले लगानीको वातावरण सुधार्न चालु बजेटमार्फत २७ वटा ऐनकानुन संशोधन गरेको बताए। कर प्रणालीमा समेत व्यापक सुधार गरिएको उनको भनाइ छ।
सरकारले आर्थिक सुधारलाई चरणबद्ध रूपमा अघि बढाएको उल्लेख गर्दै उनले पहिलो वर्ष सुधारको सुरुआत भएको, दोस्रो वर्ष थप विस्तार गरिने र त्यसपछिका वर्षमा सुधारको नतिजा तथा प्रतिफल देखिने बताए।
