काठमाडौं । कर्णाली याक्सले दोस्रो सिजनको नेपाल प्रिमियर लिग (एनपीएल)को लिग चरणको अन्तिम खेलमा जनकपुर बोल्ट्सलाई ३ रनले पराजित गरेको छ। कीर्तिपुरस्थित त्रिवि क्रिकेट मैदानमा आइतबार भएको खेलमा कर्णालीले टस हारेर पहिला ब्याटिङ गर्दै निर्धारित २० ओभरमा ९ विकेटको क्षतिमा १२९ रन बनाएको थियो।
१३० रनको लक्ष्य पछ्याएको जनकपुर बोल्ट्सले २० ओभरमा ७ विकेट गुमाउँदै १२६ रनमै सिमित रह्यो। जनकपुरका लागि सञ्जय कृष्णमुर्थीले सर्वाधिक ५१ रन बनाए। उनले ३९ बलमा १ चौका र ४ छक्का प्रहार गर्दै संगीथ कुरेसँग पाँचौँ विकेटका लागि ७५ रनको साझेदारी गरे। जनकपुरका दुई ब्याटर सुरुमै शून्य रनमै आउट भए। माज सदाकले १२, संगीथ कुरेले २५, निकोल लोफ्टी इटोनले १३ रन जोड्दा आदित्य महता अन्तिम बलमा १ रन बनाएर रनआउट भए।
कर्णालीका लागि विलियम वसिस्टोले २ विकेट लिए भने मार्क वाट, पवन सरार्फ, नन्दन यादव र सोमपाल कामीले १–१ विकेट झारे। यसअघि ब्याटिङ गरेको कर्णालीका लागि डेब्यु खेल खेलेका ओपनर इमरान शेखले ३३ रन बनाए। ३२ बलमा १ चौका र १ छक्का प्रहार गरेका उनलाई ललित राजवंशीले संजय कृष्णमुर्थीबाट क्याच गराएका थिए। २० बलमा १९ रन बनाएका गुल्शन झालाई माज सादकतले अनिलकुमार शाहबाट क्याच आउट गराए।
प्रियांक पाञ्चालले १८ बलमा १६ रन जोड्दा ललित राजवंशीले कारीको हातबाट क्याच गराएर पavilion फर्काए। विलियम वसिस्टोले १५, नाजीबुल्लाह जद्रानले १३ रन जोडे भने सोमपाल कामी १८ रनमा अविजित रहे। दोस्रो एनपीएलमा पहिलो शतक प्रहार गरेका मार्क वाट ७ बलमा ४ रन बनाएर एलबिडब्लू आउट भए।
जनकपुरका लागि ललित राजवंशी र आदित्य महताले समान २–२ विकेट लिए। संगिथ कोरे, माज सादकत र अनिल शाहले १–१ विकेट झारे। अन्तिम खेलमा जनकपुरलाई हराउँदै कर्णाली याक्स यो सिजनको एनपीएल छैटौँ स्थानमा रहँदै समाप्त भएको छ।
