काठमाडौं। त्रिभुवन विश्वविद्यालयसहित सात प्रमुख विश्वविद्यालयले उपकुलपति पाएका छन्। प्रधानमन्त्री तथा सम्बन्धित विश्वविद्यालयका कुलपति बालेन्द्र शाहले शुक्रबार सातै विश्वविद्यालयमा उपकुलपति नियुक्त गरेपछि शिक्षा तथा खेलकुद मन्त्री एवं सहकुलपति सस्मित पोखरेलले उनीहरूलाई पद तथा गोपनीयताको शपथ गराएका छन्।
त्रिभुवन विश्वविद्यालयमा प्राडा भोला थापा, पोखरा विश्वविद्यालयमा देवेन्द्र अधिकारी, पूर्वाञ्चल विश्वविद्यालयमा सुजन बाबु मरहट्टा, मध्यपश्चिम विश्वविद्यालयमा राजन सुवाल, सुदूरपश्चिम विश्वविद्यालयमा किसनदत्त भट्ट, कृषि तथा वन विज्ञान विश्वविद्यालयमा ऋषिराम कट्टेल र राजर्षि जनक विश्वविद्यालयमा श्यामनारायण लाभ नियुक्त भएका हुन्।
१० प्रतिशत छात्रवृत्ति अनिवार्य, राजनीतिक ब्यानर हटाउनू
मन्त्री पोखरेलले विश्वविद्यालय सुधारका लागि तत्काल कार्यान्वयन गर्नुपर्ने दुई प्रमुख निर्देशन दिए।
पहिलो, सबै विश्वविद्यालय तथा सम्भव भएसम्मका आंगिक क्याम्पसहरूमा १० प्रतिशत छात्रवृत्ति पूर्ण पारदर्शितासहित अनिवार्य रूपमा वितरण गर्नुपर्ने। दोस्रो, विश्वविद्यालय र क्याम्पस परिसरमा रहेका विद्यार्थी संगठन तथा ट्रेड युनियनका राजनीतिक ब्यानर तत्काल हटाउनुपर्ने।
मन्त्री पोखरेलले ‘कसैको दबाबमा नपरी व्यावसायिक तवरले जिम्मेवारी निर्वाह गर्नुहोस्, सरकार र मन्त्रालयको पूर्ण सहयोग रहनेछ,’ भन्दै नयाँ नेतृत्वलाई विश्वविद्यालयको शैक्षिक गुणस्तर र सुशासन सुधारमा केन्द्रित हुन आग्रह गरे।
