झापा। झापाको बिर्तामोडमा एक युवतीलाई बिजुलीको पोलमा बाँधेर मोसो दल्ने तथा दुर्व्यवहार गर्ने घटनामा संलग्न चार जनालाई प्रहरीले पक्राउ गरेको छ।
प्रहरीका अनुसार बिर्तामोड नगरपालिका–२ चारपानेस्थित राजगढ जाने बाटोमा शुक्रबार साँझ करिब साढे ६ बजे २१ वर्षीया युवतीमाथि अमानवीय व्यवहार गरिएको थियो। घटनाको जानकारी प्राप्त हुनासाथ इलाका प्रहरी कार्यालय अनारमनीबाट खटिएको प्रहरी टोलीले युवतीको तत्काल उद्धार गरेको थियो।
घटनामा संलग्न रहेको आरोपमा कनकाई नगरपालिका–८ का १८ वर्षीय समिर मर्डी, २० वर्षीया सबिना मुर्मु, २५ वर्षीया स्वस्तिका मुर्मु र १९ वर्षीया पूजा बस्नेतलाई प्रहरीले नियन्त्रणमा लिएको छ।
प्रहरीले घटनास्थलबाट मोसो दल्न प्रयोग गरिएको मोबिलको बट्टासहित विभिन्न १६ वटा पम्पलेट पनि बरामद गरेको जनाएको छ।
पीडित युवतीको बिर्तासिटी अस्पतालमा उपचार भइरहेको छ। चिकित्सकका अनुसार उनको स्वास्थ्य अवस्था सामान्य रहेको बताइएको छ।
प्रारम्भिक अनुसन्धानबाट पुरानो रिसइबीका कारण उक्त घटना भएको खुलेको प्रहरीले जनाएको छ। पक्राउ परेका चारै जनालाई इलाका प्रहरी कार्यालय अनारमनीको हिरासतमा राखी थप अनुसन्धान भइरहेको छ।
प्रहरीले कानुन हातमा लिएर कसैमाथि अमानवीय व्यवहार गर्ने कार्य दण्डनीय अपराध भएकाले घटनामा संलग्न जोसुकैमाथि कानुनी कारबाही गरिने जनाएको छ।
