काठमाडौँ। हुम्ला र बाजुरा जिल्लाको सीमा विवादमा सरकारले छुट्टाछुट्टै दुई समिति बनाएको छ। भूमि मन्त्रालयले सीमा सम्बन्धी प्राविधिक पक्षको अध्ययन गरी प्रतिवेदन पेस गर्न नापी विभागका उपमहानिर्देशक सुशील डंगोलको संयोजकत्वमा एक समिति गठन गरेको हो भने सीमा क्षेत्रमा हालैको घटनालाई लिएर गृह मन्त्रालयले छानविन गर्न प्रहरी वरिष्ठ उपरीक्षक (एसएसपी)को संयोजकत्वमा एक विशेष छानविन टोली गठन गरेको छ।
गृह मन्त्रालयका सचिवको संयोजकत्वमा रक्षा सचिव र सबै सुरक्षा निकायका प्रमुख तथा प्रतिनिधिहरूको उपस्थितिमा आइतबार बसेको आकस्मिक बैठकले उक्त टोली गठन गर्ने निर्णय गरेको हो।
तत्कालै विशेष टोली परिचालन, छिटो प्रतिवेदन बुझाउन निर्देशन
मन्त्रालयद्वारा जारी प्रेस विज्ञप्ति अनुसार गठन गरिएको छानविन टोलीलाई तुरुन्त कार्यस्थलमा खटिन र घटनाको विस्तृत प्रतिवेदन पेस गर्न निर्देशन दिइएको छ। घटनाको जानकारी प्राप्त हुनासाथ मन्त्रालयले तदारुकता देखाउँदै हुम्ला र बाजुरा दुवै जिल्लाबाट नेपाल प्रहरी तथा सशस्त्र प्रहरी बलको विशेष टोलीलाई घटनास्थलमा परिचालन गरिसकेको जनाएको छ।
स्थिति नियन्त्रण र दीर्घकालीन शान्तिका लागि आवश्यकता अनुसार थप सुरक्षाकर्मी परिचालन गर्न समेत दुवै सुरक्षा निकायलाई निर्देशन दिइएको छ।
सीमा क्षेत्रमा नागरिकको सुरक्षा सुनिश्चित गर्न मन्त्रालयले स्थानीय जिल्ला सुरक्षा समितिलाई निरन्तर उच्च सतर्कता अपनाउन निर्देशन दिएको छ। भविष्यमा यस्ता सीमा क्षेत्रका विवाद र घटनाहरू दोहोरिन नदिनका लागि नयाँ र ठोस सुरक्षा रणनीति अख्तियार गर्न मन्त्रालयले स्पष्ट पारेको छ।
नागरिकलाई संयमता अपनाउन अपिल
आम नागरिकको जीउधनको रक्षा र सीमा क्षेत्रमा शान्ति सुव्यवस्था कायम राख्न सरकार पूर्ण रूपमा प्रतिबद्ध रहेको गृह मन्त्रालयका प्रवक्ता एवं सहसचिव आनन्द काफ्लेले जानकारी दिए।
मन्त्रालयले सो क्षेत्रमा उत्तेजना वा त्रासको वातावरण सिर्जना हुन नदिन र शान्ति कायम राख्नका लागि हुम्ला र बाजुरा दुवै जिल्लाका आम नागरिकहरूलाई संयमता अपनाउन हार्दिक अनुरोध समेत गरेको छ।
