काठमाडौं । नेपाली कांग्रेसको आधिकारिकतासम्बन्धी विवाद अब निर्वाचन आयोगको निर्णयमा मात्र सीमित नरहेको भन्दै पूर्वसभापति शेरबहादुर देउवाले आर्थिक चलखेलको आरोपमाथि निष्पक्ष छानबिन गर्न माग गरेका छन्। उनले १८ करोड रुपैयाँ दिएर पार्टीको आधिकारिकता प्रभावित पारिएको भन्ने अभिव्यक्ति सार्वजनिक भएको उल्लेख गर्दै कांग्रेसलाई पैसाको बलमा किन्न खोजिएको आरोप लगाएका हुन्।
शनिबार काठमाडौंमा आफ्नो पक्षको काठमाडौं जिल्ला कार्यसमितिको १५औँ अधिवेशन उद्घाटन गर्दै देउवाले निर्वाचन आयोगको निर्णय प्रक्रियामाथि नै प्रश्न उठाए। निर्वाचन आयुक्तहरूलाई ज्यानको धम्की दिइएपछि अर्को पक्षको पक्षमा निर्णय गर्नुपरेको भन्ने समाचार सार्वजनिक भएको उल्लेख गर्दै उनले यस विषयको सत्यतथ्य बाहिर ल्याउनुपर्ने बताए।
‘पार्टीको आधिकारिकतासम्बन्धी निर्णयमा दबाब र आर्थिक चलखेल भएको भन्ने आरोप सार्वजनिक भएका छन्। यस्ता गम्भीर विषयमा निष्पक्ष छानबिन र सत्यतथ्य सार्वजनिक हुनुपर्छ,’ उनले भने।
देउवाले एक जना व्यक्तिले १८ करोड रुपैयाँ दिएको भन्ने अभिव्यक्ति सार्वजनिक भएको प्रसंगसमेत उठाए। उनको भनाइमा आर्थिक प्रभावका आधारमा पार्टीको आधिकारिकता निर्धारण गर्ने प्रयास भएको छ। पार्टीलाई पैसाको प्रभावमा पारेर निर्णय गराउने प्रवृत्ति स्वीकार्य नहुने उनको तर्क थियो।
उनले पार्टी सभापति गगनकुमार थापाप्रति लक्षित गर्दै १८ करोड रुपैयाँमा पार्टी अरूलाई बेच्ने प्रवृत्तिले कांग्रेसको संरक्षण गर्न नसक्ने टिप्पणी गरे। कांग्रेसको राजनीतिक पहिचान, सिद्धान्त र कार्यकर्ताको विश्वासलाई आर्थिक लेनदेनसँग जोड्न नमिल्ने उनको भनाइ थियो।
‘पार्टी पैसाको प्रभावमा होइन, विधि, विधान र कार्यकर्ताको विश्वासमा चल्नुपर्छ,’ देउवाले भने।
उनले पार्टीको आन्तरिक विवादलाई व्यक्तिगत स्वार्थभन्दा माथि राख्नुपर्ने पनि बताए। आफूले राजनीतिक जीवनमा धेरै उपलब्धि हासिल गरिसकेको उल्लेख गर्दै अब व्यक्तिगत पद र लाभभन्दा पार्टी तथा मुलुकका लागि योगदान गर्ने समय आएको उनको भनाइ थियो।
‘मैले जीवनमा धेरै कुरा पाइसकेको छु। अब मलाई व्यक्तिगत रूपमा केही पाउनु छैन, बरु पार्टी र देशका लागि योगदान दिनु छ,’ उनले भने, ‘यो पार्टीलाई जोगाउने र देशलाई समृद्ध बनाउने जिम्मेवारी हामी सबैको हो।’
अदालतबाट रुख चिह्न पाउने आशा
देउवाले कांग्रेसको आधिकारिकतासम्बन्धी विवादमा अदालतबाट न्याय पाउने विश्वास व्यक्त गरेका छन्। निर्वाचन आयोगको निर्णयपछि उत्पन्न विवाद न्यायिक प्रक्रियाबाट टुंगिने र आफ्नो पक्षले पार्टीको आधिकारिकता तथा चुनाव चिह्न रुख प्राप्त गर्ने उनको अपेक्षा छ।
उनले अदालतको निर्णय आफ्नो पक्षमा आउने विश्वाससहित राजनीतिक गतिविधि अघि बढाइरहेको बताए।
‘मलाई विश्वास छ, यसपटक हामीले रुख चुनाव चिह्न लिएर अघि बढ्ने अवसर पाउनेछौँ,’ उनले भने, ‘अदालतबाट न्यायपूर्ण निर्णय आउनेछ भन्ने विश्वासका साथ हामी दृढतापूर्वक अघि बढ्छौँ।’
