काठमाडौं । स्वास्थ्य र सामाजिक उत्तरदायित्वलाई जोड्दै जीवन विज्ञान युवा वृत्तले संविधान दिवसको अवसरमा ‘आरोग्यका लागि दौड, समाजका लागि योगदान’ नारासहित दौड कार्यक्रम आयोजना गर्ने भएको छ।
असोज ३ गते बिहान ७ बजे काठमाडौंको दशरथ रंगशाला, त्रिपुरेश्वरबाट सुरु हुने दौडमा ५ किलोमिटर र १० किलोमिटर दूरीका धावक सहभागी हुनेछन्। आयोजकका अनुसार व्यक्तिगत स्वास्थ्य प्रवर्द्धनसँगै बाढी तथा विपद्बाट प्रभावित विद्यालयका विद्यार्थीलाई सहयोग गर्ने उद्देश्यले कार्यक्रम आयोजना गर्न लागिएको हो।
दौडबाट विशेषगरी विपद्का कारण प्रभावित विद्यालयका विद्यार्थीका लागि मनोसामाजिक सहयोग तथा शैक्षिक सामग्री जुटाउने लक्ष्य राखिएको छ। विपद्पछि विद्यार्थीको पढाइसँगै मानसिक स्वास्थ्यमा समेत असर पर्ने भएकाले उनीहरूलाई आवश्यक सहयोग उपलब्ध गराउने उद्देश्यले सामाजिक सेवासँग दौडलाई जोडिएको आयोजकले जनाएको छ।
जीवन विज्ञान युवा वृत्तले स्वस्थ शरीर, शान्त मन र सकारात्मक जीवनशैली निर्माणका लागि नियमित शारीरिक गतिविधिको महत्वपूर्ण भूमिका रहने जनाएको छ। दौडलाई व्यक्तिगत स्वास्थ्यमा मात्र सीमित नराखी विपद्मा परेका समुदाय र विद्यार्थीप्रतिको सामाजिक दायित्व पूरा गर्ने माध्यमका रूपमा अघि बढाउन खोजिएको आयोजकको भनाइ छ।
कार्यक्रममा सहभागी हुन इच्छुकले दर्ता गरेर दौडमा सहभागी हुन सक्नेछन्। दौड पूरा गर्ने सहभागीलाई सहभागिता पदक, टी–सर्ट, प्रमाणपत्र र नास्ताको व्यवस्था गरिएको छ।
आयोजकले कार्यक्रमलाई युवाहरूलाई स्वस्थ जीवनशैलीतर्फ प्रेरित गर्ने तथा सामाजिक सेवामा सक्रिय रूपमा जोड्ने अवसरका रूपमा लिएको छ। व्यक्तिगत आरोग्यसँगै विपद् प्रभावित विद्यार्थीका लागि योगदान गर्ने भएकाले दौडलाई स्वास्थ्य र सामाजिक सेवाको साझा अभियानका रूपमा अघि बढाइएको हो।
