काठमाडौं । भोटेकोशी बाढी प्रभावित विद्यार्थीको शिक्षाका लागि सरकारले करिब एक अर्ब रुपैयाँ बराबरको ‘सुनिश्चित भविष्य छात्रवृत्ति योजना’ घोषणा गरेको छ।
शिक्षा तथा खेलकुद मन्त्रालयले निजी विद्यालयका छाता संगठन, सरकारी तथा गैरसरकारी संस्थासँगको सहकार्यमा प्रारम्भिक बालविकासदेखि कक्षा १२ सम्मका करिब एक हजार विद्यार्थीलाई छात्रवृत्ति दिने योजना ल्याएको हो।
योजनाअनुसार प्रभावित विद्यार्थीलाई आवश्यकता हेरेर पूर्ण, आंशिक तथा आवासीय छात्रवृत्तिसँगै विद्यालय शुल्क छुट, पाठ्यपुस्तक, पोसाक, शैक्षिक सामग्री, आवास र खानालगायत सुविधा उपलब्ध गराइनेछ।
बाढीका कारण विद्यालय जान नसकेका, आर्थिक रूपमा कमजोर, अभिभावक वा परिवारका सदस्य गुमाएका तथा सम्पर्कविहीन भएका र विशेष सहयोग आवश्यक पर्ने बालबालिकालाई प्राथमिकता दिइने मन्त्रालयले जनाएको छ।
शिक्षामन्त्री सस्मित पोखरेलले निजी तथा संस्थागत विद्यालयले सामाजिक उत्तरदायित्वअन्तर्गत सरकारसँग सहकार्य गरेर विपद् प्रभावित बालबालिकाको शिक्षामा सहयोग गर्न लागेको बताए।
गत भदौ १० गते भोटेकोशी नदीमा आएको बाढीबाट रसुवा, नुवाकोट, धादिङ, गोरखा र तनहुँका १५ स्थानीय तह प्रभावित भएका थिए। प्रारम्भिक विवरणअनुसार रसुवा, नुवाकोट र धादिङका १९ विद्यालय क्षतिग्रस्त, १६ शिक्षक र २१७ विद्यार्थी सम्पर्कविहीन तथा ९ हजार ७४२ विद्यार्थीको सिकाइ प्रभावित भएको छ।
