काठमाडौं। फुटबल विश्वकप-२०२६ मा फकल्याण्ड टापुसँग जोडिएको ब्यानरलाई लिएर विवादमा घेरिएको अर्जेन्टिनाको टोलीको समर्थनमा अब ह्वाइट हाउस उत्रिएको छ।
ह्वाइट हाउसले टोलीको अभिव्यक्ति स्वतन्त्रताको अधिकारको बचाउ गर्दै खेलाडीलाई अमेरिकामा यस्ता बयान दिने अधिकार भएको बताएको छ।
सेमिफाइनल खेलपछि अर्जेन्टिनाका खेलाडीले एउटा ब्यानर फहराएका थिए। जसमा लेखिएको थियो- फकल्याण्ड अर्जेन्टिनाको हो। यस ब्यानरमार्फत अर्जेन्टिनाले फकल्याण्ड टापुमाथि आफ्नो दाबी दोहोर्याएको थियो। जसकारण विवाद खडा भयो।
यस मामिलामा फिफाले अर्जेन्टिनाविरुद्ध अनुशासनिक कारबाही गर्न सक्छ। खेलाडीहरूको यो कदम फिफाको नियमको उल्लंघन मानिएको छ। जसअन्तर्गत राजनीतिक बयानबाजी गर्न पाइँदैन।
पत्रकारहरूसँगको कुराकानीमा शुक्रबार ह्वाइट हाउस फिफा टास्क फोर्सका प्रमुख एन्ड्रयू जुलियानीले टोलीले अमेरिकामा यस्ता बयान दिने मौका र अधिकार पाएको बताए।
उनले अमेरिकी संविधानको पहिलो संशोधनको हवाला दिँदै भने, ‘हामी अमेरिकामा आफ्नो पहिलो संशोधन अन्तर्गत प्राप्त अभिव्यक्ति स्वतन्त्रताको अधिकारमा विश्वास गर्छौं।’
जुलियानीको यो बयानले विवाद अझ गहिरिन सक्छ। अर्कोतर्फ, बेलायतको प्रधानमन्त्री कार्यालय डाउनिङ स्ट्रिटले पनि फिफासँग यस पूरा मामिलाको छानबिन गराउने मागको समर्थन गरेको छ।
फकल्याण्ड टापु दक्षिण(पश्चिम एटलान्टिक महासागरमा अवस्थित एउटा यस्तो क्षेत्र हो, जसमाथि बेलायतको नियन्त्रण रहेको छ। यस टापुको सम्प्रभुतालाई लिएर बेलायत र अर्जेन्टिनाबीच लामो समयदेखि विवाद चल्दै आएको छ।
