काठमाडौं। मुटुसम्बन्धी समस्या देखिएपछि एमाले नेतृ एवं बागमती प्रदेशका पूर्वमुख्यमन्त्री अष्टलक्ष्मी शाक्यको बिहीबार आकस्मिक रूपमा ‘एन्जियोप्लास्टी’ शल्यक्रिया गरिएको छ।
पाटन स्वास्थ्य विज्ञान प्रतिष्ठान (पाटन अस्पताल) मा बिहीबार बिहान सफल शल्यक्रिया भएको उनका पतीसमेत रहेका एमाले नेता अमृत बोहराले बताए। नेतृ शाक्यको स्वास्थ्य अवस्था सुधारोन्मूख रहेको, तरल पदार्थ खान दिइएको उनले बताए।
चिकित्सकले तीन दिनमा डिस्चार्ज गर्न सकिने जानकारी दिएका छन्। शाक्य हाल सघन उपचार कक्षमा उपचाररत् छिन्।
शल्यक्रियामा अस्पतालको मुटुरोग विभागका प्रमुख डा अशोक अधिकारी, डा प्रबिन्द्र महर्जन, डा आनन्द जिसीको टोली संलग्न थियो।
बोहराका अनुसार शाक्यलाई बुधबार राति छाती दुखेका कारण अस्पताल ल्याइएको थियो। सुरुमा मनमोहन अस्पताल लगिएको थियो। परीक्षणबाट हार्ट अट्याक (एक्युट मायोकोर्डियल इन्फरक्सर्न) देखिएकाले पाटन लगेर एन्जियोप्लास्टी गरिएको हो।
एमाले नेतृ विन्दा पाण्डेले बुधबार भूमिगत योद्धाहरूको योगदानको दस्तावेज तयार गर्ने योजना बनाउन सँगै रहेकामा राति स्वास्थ्य समस्या देखिएको बताएकी छन्।
‘राति उहाँलाई गाह्रो भएपछि मनमोहन अस्पताल जाँदा मुटुमा समस्या देखिएपछि बिहान पाटन अस्पताल पठाइएछ,’ उनले फेसबुकमा लेखेकी छन्, ‘पाटनमा परीक्षण गर्दा मुटुको एउटा भल्व बन्द रहेको देखिएपछि तुरुन्तै एन्जिओप्लाष्टि गरेर अहिले स्वास्थ्यलाभ गरिरहनु भएको छ। समय ठ्याक्क मिलेकोले हामीले छरक्क भेट्न पायौं। आइसियुमा उपचाररत हुनुभएकाले ‘छिटो स्वास्थ्य लाभ गर्नका लागि धेरै जना नभेट्नु जाती’ भनेर डाक्टरले भनेको कुरा साथीहरूलाई पनि जानकारी दिनुहोला भन्नुभयो। उहाँ ३-४ दिनमा नै डिस्चार्ज हुन सक्नुहुन्छ भन्ने डाक्टरको भनाई रहेका त्यसपछि नै साथीहरू भेटौंला भन्ने उहाँको सुझाव पनि यहाँहरूमा सेयर गर्न चाहेँ।’
