काठमाडौं। नेपालले प्रतिनिधिसभा सदस्यको निर्वाचन बिहीबार सम्पन्न गरेपछि छिमेकी देश भारतले स्वागत गरेको छ।
भारतीय विदेश मन्त्रालयका प्रवक्ता रणधीर जैसवालले उत्साहजनक सहभागिताका साथ नेपालमा लोकतान्त्रिक जनादेशको प्रयोग भएको बताए।
‘गत वर्षको असामान्य अवस्थाको पृष्ठभूमिमा आयोजित यो चुनाव सफलतापूर्वक सम्पन्न गरेकोमा हामी प्रधानमन्त्री सुशीला कार्की, सरकार र नेपालका जनतासाथै सरोकारवालालाई बधाई दिन्छौँ,’ जैसवालले भनेका छन्।
भारतले नेपालको नयाँ सरकारसँग मिलेर काम गर्ने तत्परता पनि व्यक्त गरेको जैसवालले बताएका छन्। ‘आपसी हितका लागि हाम्रा दुई देश र जनताबीचको बलियो सम्बन्धलाई अझ सुदृढ तुल्याउन हामी नेपालको नयाँ सरकारसँग मिलेर काम गर्न तत्पर छौँ,’ उनले भनेका छन्।
