काठमाडौं । बंगलादेशको ढाकास्थित बसुन्धरा किङ्स इरिनाको मैदानमा जारी साफ यु–२० महिला च्याम्पियनसिपमा नेपालले श्रीलंकामाथि लगातार दोस्रो पटक पनि एकतर्फी जित दर्ता गरेको छ। बिहीबार सम्पन्न खेलमा नेपालले श्रीलंकालाई ७–० गोल अन्तरले पराजित गर्दै सेमिफाइनल पुग्ने सम्भावना बलियो बनाएको छ।
नेपालले पहिलो हाफमै ४ गोल गर्दै खेलको लय आफ्नो पकडमा राख्यो। खेलको १६औँ मिनेटमा पूर्णिमा राईले गोल गर्दै अग्रता दिलाइन्। सेनु परियारको दायाँबाट आएको क्रसमा श्रीलंकाली डिफेन्डरले क्लियर गर्न नसकेपछि बारमा लागेर आएको बलमा पूर्णिमाले हेड मारिन्। दोस्रो प्रयासमा उनले गोल गर्न सफल भइन्।
३५औँ मिनेटमा वैकल्पिक खेलाडीका रूपमा मैदान प्रवेश गरेकी कुसुम खतिवडाले दोस्रो गोल गरिन्। त्यसको केहीबेरमै सरिता नाथले फ्रिकिकबाट तेस्रो गोल गरिन्। पहिलो हाफको इन्जुरी समयमा कुसुमले व्यक्तिगत दोस्रो तथा नेपालको चौथो गोल गर्दै पहिलो हाफमा सानदार ४–० को अग्रता बनाइन्।
दोस्रो हाफमा पनि नेपालले आक्रमणको गति कम गर्न दिएन। ६७ औँ मिनेटमा बिर्सना चौधरीले पेनाल्टीमार्फत पाँचौँ गोल गरिन्। त्यसअघि समीक्षा मगरलाई बक्सभित्र फउल गरिएको थियो।
७४औँ मिनेटमा समीक्षा मगरले रिबाउन्डमा गोल गर्दै छैटौँ गोल गरिन् भने ७८औँ मिनेटमा व्यक्तिगत दोस्रो तथा नेपालका लागि सातौँ गोल गर्दै स्कोरलाई ७–० मा पुर्याइन्।
खेलको ६२औँ मिनेटमा श्रीलंकाले एक मात्र राम्रो मौका पाएको थियो। नेपाली गोलकिपर लिला जोशी बीट भए पनि गङ्गा रोकायाले गोल लाइनबाट बल क्लियर गरिन्। नेपालले अब आगामी शनिबार भुटानसँग तेस्रो खेल खेल्नेछ।
