काठमाडौं । फिफा विश्वकप २०२६ अन्तर्गत छनोट दोस्रो चरणको नेपाल र यमनबीचको खेल बराबरी भएको छ। मंगलबार राति प्रिन्स महम्मद बिन फहाद स्टेडियममा भएको खेलमा अतिरिक्त समयमा यमनले गोल फर्काएपछि नेपालले बराबरीमा चित्त बुझाएको हो।
खेल शुरु भएको नवौँ मिनेटमै पेनाल्टीमार्फत गोल गर्दै यमनले १–० को अग्रता लिएको थियो। यमनका एन अल गाहवाशीले गोल गर्दै अग्रता दिलाए पनि २२औँ मिनेटमा सञ्जीव विष्टले नेपाललाई १–१ को बराबरीमा ल्याए।
त्यसपछि दोस्रो हाफमा ६६औँ मिनेटमा जिलेस्पीजंग कार्कीले गोल गर्दै नेपाललाई २–१ को अग्रता दिलाएका थिए। तर ९१औँ मिनेटमा यमनका एम अल दाहीले गोल गर्दै खेल २–२ को बराबरीमा ल्याए।
