काठमाडौं । ललितपुर महानगरपालिका–१४ मा रहेको एक निर्माणाधीन घरबाट प्रहरीले ठूलो परिमाणमा नगद रकम, अवैध सुन र सुन पगाल्ने मेसिन सहित पाँच जनालई पक्राउ गरेको छ ।
प्रहरी वृत्त सातदोबाटोबाट खटिएको प्रहरीले भारतीय नागरिक युवराज विभुतेले भाडामा लिएको फ्ल्याटमा खानतलासी गरी तीनजना भारतीय र दुई नेपाली नागरिकलाई नियन्त्रणमा लिएको हो ।
फक्राउ पर्नेमा भारतको महाराष्ट्रका २८ वर्षीय युवराज विभुते, २० वर्षीय विक्रम यलवर, १८ वर्षीय अभिषेख विभुते, भक्तपुर सूर्यविनायक नगरपालिका वडा नम्बर १ का २० वर्षीय सिद्धान्त चौलागाईं र ललितपुरको महालक्ष्मी नगरपालिका वडा नम्बर ८ का २० वर्षीय यसवन्त सुनार रहेका छन् ।
प्रहरीका अनुसार बिहीबार ललितपुर महानगरपालिका वडा नम्बर १४ मा रहेको एक निर्माणाधीन घरको तेस्रो तलामा शंकास्पद कारोबार भइरहेको सूचना आएको थियो । त्यसपछि प्रहरी वृत्त सातदोबाटोबाट खटिएको टोलीले भारतीय नागरिक युवराज विभुतेले भाडामा लिएको फ्ल्याटमा खानतलासी गरेको थियो ।
त्यसक्रममा प्रहरीले सुनजस्तो देखिने पहेँलो धातु १६९.९७० ग्राम, चाँदीजस्तो देखिने धातु २४७.२५० ग्राम, डिजिटल तराजु एक थान, विभिन्न कम्पनीका मोबाइल सात थान, हार्ड डिस्क एक थान, सिमकार्ड, चेकबुक तथा बैंकमा नगद जम्मा गरेको भौचर बरामद गरेको थियो ।
यसैगरी, ५० लाख चार हजार रुपैयाँ र सुन पगाल्ने मेसिन पनि बरामद गरेको थियो ।
